Ata-babalarymyzdyń asqaq rýhy, memlekettiliktiń susy men sesi Eltańbada kórinis tapsa ıgi – Májilis depýtaty
ASTANA. KAZINFORM – Ulttyq Quryltaı - irgeli eldik máseleler ortaǵa salynatyn, ıdeologııalyq baǵdarymyz talqylanatyn alqaly alań. Osyǵan oraı kúni keshe Atyraýda ótken Ulttyq Quryltaıda ult ómirine qatysty kóptegen mańyzdy máselemen qatar, eldigimizdiń aıshyqty belgisi - Gerb máselesinińde kóterilýi oryndy.
Bul pikirdi QR Parlamenti Májilisiniń depýtaty Abzal Quspan bildirdi.
El Prezıdenti Qasym-Jomart Toqaev bul jaıynda: «Eltańbamyzǵa qatysty synı pikirler aıtylyp qalady. Ony Keńes zamanyndaǵy Gerbke uqsatyp jatady. Tym eklektıkalyq, kúrdeli deıdi. Mundaı oıdy el isine beı-jaı qaramaıtyn belsendi azamattar ǵana emes, mamandar da aıtyp júr. Oryndy paıymdar eskerýsiz qalmaýy kerek. Ortaq kelisimge kelgen jaǵdaıda arnaýly komıssııa qurýǵa bolady. Bul komıssııa máseleni jan-jaqty qarastyryp, qoǵamdyq talqylaý ótkizedi. Sosyn Qazaqstannyń jańa Eltańbasynyń jobasyn jasaýǵa ashyq baıqaý jarııalanady» dep, muny kópshilikpen birge keńinen talqylaı otyryp, ortaq sheshimge kelýdi usyndy.
Bul usynys qoǵamnyń qyzyǵýshylyǵyn týǵyzyp, qyzý talqylanýda. Olardyń bir toby qoldanystaǵy gerbti osy qalpynda qaldyraıyq dese, endi biri zaman talabyna saı ózgerteıik deıdi. Bul - zańdy ári oń qubylys. Azamattyq qoǵamnyń belsendiligi men jetilgeniniń kórinisi.
Ekinshi jaǵynan, jurtshylyqtyń eldik nyshandarǵa beı - jaı qaramaıtynyn, otanshyldyq seziminiń joǵarylyǵyn aıqyn ańǵartady.
Álemdik tájirıbege súıensek, memleket gerbi sol eldiń tereń tarıhymen, tól dúnıetanymymen jáne alǵa qoıǵan muratymen tyǵyz baılanysty bolady. Gerb ataýynyń ózi «mura»degen uǵymdy bildiredi.
Keıbir elder gerbsiz, emblemamen ǵana shektelgen.
Bul rette, bizdiń halqymyzdyń tarıhy da eldik nyshandar bederleý tájirıbesine baı. Tamyryn saq, ǵun, túrik qaǵanaty zamanynan tartatyn tańbalarymyz - jalpy gerbtiń túpatasydeýge tolyq negiz bar. Babalarymyz qurǵan kóshpeli órkenıet ónimi - tańba jasaý dástúri Ǵundar arqyly Eýropa elderine taralǵan deýge bolady. Sondyqtan tarıhy tereń tańba jasaý tájirıbemizdi el gerbin jetildirý isine paıdalanýdyń mańyzy zor.
Ras, qoldanystaǵy gerbimiz de jaqsy jasalǵan. Ultymyzǵa tán qasterli belgilermen birlik pen beıbitshilikti aıshyqtaýdy maqsat tutqan. Ol osy kezeńniń ereksheligi men suranysyna saı el halqyn biriktirýshilik qyzmetin múltiksiz atqaryp keledi.
Bul rette, Qazaq memleketi 1991 jyly ǵana paıda bolmaǵanyn, onyń memlekettilik tarıhynyń tereńde jatqanyn da eskergenimiz jón. Ol - arǵydaǵy Saq, Ǵun, Túrik qaǵanaty, Ulyq Ulys - Joshy ulysynyń, bergidegi Qazaq handyǵynyń tikeleı murageri. Bul - erlik pen órlikke toly tarıh.
Bıyl Qazaq Dalasynda tý kótergen Joshy ulysy - Altyn Ordanyń qurylǵanyna 800 jyl tolýyn atap ótkeli otyrmyz.
«Mine, Qazaq eliniń osyndaı tereń tarıhı sabaqtastyǵy, jaýynger ata-babalarymyzdyń asqaq rýhy, memlekettiliktiń susy men sesi, ataǵy men aıbyny Gerbte kórinis tapsa ıgi. Sondyqtan aldaǵy ýaqytta osy baǵytta kóp bolyp keńesý artyqtyq etpeıdi. Osy oraıda, Prezıdenttiń Gerbti qoǵammen talqylaý týraly bastamasyn qoldaı otyryp, ony tarıhı sabaqtastyqty, zaman suranysyn eskerip, jetildirý jaıyn oılastyrǵan jón dep sanaımyz. Bul mańyzdy isti osyǵan jaýapty memlekettik organdardyń qolǵa alyp, kópshilikpen, tıisti mamandarmen, qoldanystaǵy gerb avtorymen jan-jaqty talqylaý uıymdastyrýyn usynamyn»,-deıdi depýtat.
