Ata-apam qazaqtyń qonaqjaılyǵyn únemi aıtyp otyratyn – Óskemende turatyn nemis qyzy
Óskemende turatyn Irına Gertfelderdiń arǵy ata-apasy elimizge 1930 jyldary qonys aýdarǵan eken. 21 jastaǵy qyz qazir polıtseı bolyp jumys isteıdi. 1 mamyr – Qazaqstan halyqtarynyń birligi kúnine oraı QazAqparat tilshisi onymen jolyǵyp, suhbat quryp qaıtqan bolatyn.
- Áńgimemizdi týyp-ósken jerińizden bastasaq...
- 2002 jyly 24 naýryzda Shyǵys Qazaqstan oblysy Jarma aýdany Qalbataý aýylynda dúnıege keldim. Sol jaqtaǵy orta mektepte bilim aldym. 2007 jyly 9-synypty támámdaǵannan keıin Óskemendegi Qazaqstan-Amerıkalyq erkin ýnıversıtetiniń joǵary kolledjine oqýǵa tústim. Tańdaǵan mamandyǵym – zańger. Kolledjden soń osy ýnıversıtette oqýymdy ary qaraı jalǵastyrdym.
- Ata-babańyz Qazaqstanǵa qashan qonys aýdarǵan ?
- Tegimnen baıqaǵan bolarsyz, meniń ultym nemis. Ata-apamnyń áke-sheshesi Qazaqstanǵa 1930 jyldary qonys aýdarǵan. Munda olardy qazaq halqy óte jaqsy qarsy aldy. Qıyn-qystaý zamanda barynsha kómektesip, qoldaý tanytqan. Olar qazaqtyń qonaqjaılyǵyn, ózgege kómektesýge degen shynaıy nıetin kórip, osynda birjola qalýdy uıǵarǵan.
- Quqyq qorǵaý organyna qalaı keldińiz? Bul salany tańdaýyńyzǵa ne túrtki boldy ?
- Ákem de, sheshem de áskerı adam. Ákem uzaq ýaqyt Qazaqstannyń ońtústiginde ushqyshtar quramynda bolsa, anam Shyǵys Qazaqstanda qurlyqta, áýede, keıin jóndeý-qalpyna keltirý áskeri qatarynda qyzmet atqardy. Áskerı otbasynda tárbıelengendikten bala kúnnen áke-shesheme uqsaǵym keldi. Biraq ómirimdi quqyq qorǵaý organymen baılanystyramyn dep oılamadym. Mamandyq tańdaý týraly suraq týyndaǵanda zańger bolamyn dep sheshtim.
Joǵaryda aıtqanymdaı, mektepti támamdaǵannan keıin kolledjge tústim. Onda oqyp júrgende Óskemen qalalyq PB Ertis polıtsııa bólimshesiniń tergeý bóliminde bir emes birneshe ret taǵylymdamadan óttim. Jumys barysy ózime unady. Sóıtip, osy salada ter tógýge bel baıladym.
2020 jyly kolledjdi bitirgen soń ýnıversıtetke qashyqtan oqýǵa qujat tapsyrdym da qalalyq polıtsııa basqarmasyna jumysqa ornalasý úshin ótinish berdim. Barlyq synaqtan, medıtsınalyq komıssııadan ótip, dene shynyqtyrý boıynsha tıisti normatıvterdi tapsyryp, sol jyldyń qyrkúıeginde jedel krımınalıstıka bólimine jumysqa qabyldandym. Sodan keıin Pavlodardaǵy qylmystyq atqarý júıesi akademııasyna oqýǵa baryp keldim. 2020 jyldyń jeltoqsan aıynda maǵan polıtsııa kishi serjanty sheni berildi. Jumysym – kúrdeli krımınalıstıkalyq hattamalardy tirkeý, kúdiktilerdiń, aıyptalýshylardyń, qylmystyq-atqarý júıesi mekemelerinde jazasyn ótep jatqandardyń, profılaktıkalyq esepke qoıylǵan adamdardyń saýsaq izderin alý jáne tirkeý.
- Jaqsy polıtseı qandaı bolýy kerek ?
- Quqyq qorǵaý organynda qyzmet etý úshin birinshi ustamdylyq, tabandylyq kerek dep oılaımyn. Sebebi túrli adam, san alýan jaǵdaı bolady. Jaqsy jumys isteý úshin salqynqandylyq tanytyp, jyldam sheshim qabyldaı bilýiń kerek. Al emotsııaǵa erik berseń qatelik jasaýyń ábden múmkin. Bul sala qatań tártip pen jaýapkershilikti qajet etedi. Sondyqtan ekiniń biri polıtseı atana almaıdy.
- Áıel adamǵa polıtsııada jumys isteý qıyn emes pe ?
- Eń birinshi nıetke baılanysty. Ózińe bul sala unasa qıyndyqtary jeńil bolyp kórinedi.
- 1 mamyr – Qazaqstan halqynyń birligi kúninde jerlesterińizge qandaı tilek aıtasyz ?
- Men úshin bul jarqyn jáne meıirimge toly mereke. Qazaqstanda 130-dan astam túrli ult ókili turady. Osy mereke elimizdi meken etken ulttardyń salt-dástúrlerimen jáne mádenıetimen tanystyryp qana qoımaıdy, halyqty biriktire túsedi. Sonyń arqasynda qazaqstandyqtardyń barlyǵy tatýlyq pen kelisimde ómir súrip jatyr. Óz tarıhymyzdy bilý, salt-dástúr men ádet-ǵuryptardy qurmetteý óte mańyzdy. Birlik kúninde tek yntymaqtyń arqasynda joǵary nátıjelerge jetýge, qýatty zamanaýı memleket qurýǵa bolatynyn túsinemiz. Mereke qutty bolsyn!
- Áńgimeńizge kóp rahmet!
