Ata-anasynan 14 jasynda qalǵan Baǵdat Ahmetjanov: Men úshin otbasy – baǵa jetpes qundylyq
ALMATY. QazAqparat – Almatylyq Ahmetjanovtar úshin Otbasy kúniniń orny bólek. Otbasy – syılastyq, jarastyq ornaǵan orta, kishkentaı Otan. Ol baǵa jetpes qundylyq dep esepteıdi úsh balanyń ákesi Baǵdat Ahmetjanov.
Baǵdat Ahmetjanov ata-anasynan erte aıyrylǵan. Sondyqtan ol úshin otbasynyń orny erekshe.
«Men ata-anamnan 14 jasymda aıyrylyp qaldym. Ekeýi de kólik apatynan kóz jumdy. Biz eki aǵaıyndymyz. Saǵdat degen inim bar. Bizdi anamnyń sińilisi eshkimnen kem etpeı ósirdi, tárbıeledi, oqytty. Ol kisige aıtar alǵysymyz sheksiz»,– deıdi Baǵdat Ahmetjanov.
Onyń aıtýynsha, otbasy - baǵa jetpes qundylyq. Ony saqtap, qurmetteý ár adamnyń basty mindeti.
«Men 2015 jyly 21 jasymda úılendim. Qazir úsh balanyń ákesimin. Eki ul, bir qyzym bar. Otbasy – Alla syılaǵan keremetterdiń biri. Otbasynda adam boıyndaǵy asyl qasıetter jarqyraı kórinip, qalyptasady. Jaqyndaryna, týǵan-týysqandaryna degen súıispenshilik artady. Biz otbasyn Otannyń kishkentaı bir bólshegi retinde qarastyramyz»,– deıdi ol.
Baǵdat Ahmetjanov «Almatyjylýjaıenergo» jaýapkershiligi shekteýli seriktestiginde operator bolyp jumys isteıdi, jary Aqmaral Dúısenova jekemenshik kompanııalardyń birinde esepshi. Jaqynda jas otbasy «Almaty jastary» baǵdarlamasy boıynsha baspanaly boldy.
«Qazir jastarǵa arnalǵan baǵdarlamalar óte kóp. Búgingi kúni bizde sol memleket tarapynan beriletin jeńildikterdiń jemisin kórip otyrmyz. Jumys isteıtin jastarǵa arnalǵan jaldamaly baspana baǵdarlamasy aıasynda bir bólmeli páterge ıe boldyq. Bul biz úshin úlken kómek. Endigi maqsat óz baspanamyzǵa qarjy jınaý. Jalpy jumys isteıtin jastarǵa múmkindikter barshylyq»,– deıdi úsh balanyń ákesi.
