Ata-anasy uıyqtap jatqanda ketip qalǵan: ShQO-da joǵalǵan bala tabyldy
ÓSKEMEN. QazAqparat – Shyǵys Qazaqstan oblysy Altaı aýdanynda polıtsııa qyzmetkerleri joǵalǵan balany tapty, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, ýchaskelik polıtsııa ınspektory patrýldeý kezinde jalǵyz júrgen 9-10 jas shamasyndaǵy balany baıqap qalady. Ol Altaı qalasyndaǵy Panfılov kóshesi boıyndaǵy sońǵy aıaldamada turǵan.
Tártip saqshysy balanyń kim ekenin jáne ata-anasynyń ornalasqan jerin anyqtaýǵa tyrysty. Biraq balaqaı onyń suraqtaryna jaýap bermegen. Sóıtse ol dıspanserde esepte turǵan bala bolyp shyqty.
«Qalalyq psıhologııalyq-nevrologııalyq dıspanserine júginý nátıjesinde kámelet jasyna tolmaǵan balanyń jeke basy, turǵylyqty mekenjaıy jáne ata-anasynyń derekteri anyqtaldy. Sonymen qatar balany medıtsına qyzmetkerleri qarap, onyń ómirine eshteńe qaýip tónip turmaǵandyǵyn aıtty», - delingen aqparatta.
Keıinnen belgili bolǵandaı, úıde uıyqtap jatqan ata-anasy uldarynyń syrtqa qalaı shyǵyp ketkenin baıqamaı da qalǵan. Polıtsııa qyzmetkeriniń arqasynda aman-esen úıine qaıtarylǵan balanyń anasy tártip saqshylaryna alǵys aıtty.
