Ata-anasy munaradan sekirip ketken aqtóbelik oqýshyny apasy asyrap alatyn boldy
AQTÓBE. QazAqparat - Aqtóbe qalasy Qýraıly aýylynda turatyn 7 jastaǵy Krıstına Shýster keshe ata-anasynan aıyryldy. Endi ony apasy Alena Shýster baýyryna baspaq, dep habarlaıdy QazAqparat tilshisi.
Aqtóbe qalasy Qýraıly aýylynda turǵan Krıstıka Shýster keshe aýrýhanaǵa túsip, ony ógeı sheshesi Ásel Dúısenbaevanyń ony uryp-soqqany belgili boldy. Kóz janary qantalap, mıy shaıqalǵan oqýshy úıine qaıta oralǵysy kelmeıtinin, shkaf ishine tyǵylyp, ash otyrǵanyn da aıtqan bolatyn . Sol kúni keshke Vladımır Shýster men Ásel Dúısenbaeva aýyl shetindegi bıik munaraǵa shyǵyp, sekirip ketken. Oqıǵa ornyna jetken polıtsııa, jergilikti ákimdik, psıhologtar men týǵan-týystary olardy eki saǵat boıy kóndire almaǵan. Kelissóz nátıjesiz aıaqtalyp, Shýster men júkti Dúısenbaeva oqıǵa ornynda qaza boldy .
Qazirgi kezde qalalyq bilim bóliminiń qorǵanshylyq sektory zábir kórgen oqýshymen sóılesip, oǵan apasy Alena Shýster qamqor bolatynyn aıtqan. Oqýshy bul sheshimmen kelisip otyr.
«Apasy Alena Shýster balany asyrap alý usynysymen shyqty. Onyń balany baǵyp, tárbıeleýge bar jaǵdaıy keledi. A.Shýster turmysta, eki balasy bar. Qazir qujattaryn túgeldep, jınap jatyr. Krıstına Shýsterge apasy týraly atqan kezde, ol qarsy bolmady. Qazir bala aýrýhanada. Shyqqan soń bir aı kámeletke tolmaǵandardy beıimdeý ortalyǵynda bolady. Keıin bala apasymen birge turýy múmkin», - dedi qalalyq bilim bóliminiń sektor meńgerýshisi Aǵyrys Shagırova.
Aıta keteıik, qazir aýyl ishi bolǵan oqıǵany estip, ań-tań bolyp otyr. «Keshe bizdi munaraǵa qaraı jaqyndatpady. Olar munaranyń ortasynda, shamamen 60-70 metr bıiktikte otyrdy. Kelissóz júrip jatqan soń túsedi dep oılaǵan edik. Alaıda, bári qaıǵyly aıaqtaldy. Bul jerde áleýmettik jelide jazylǵan túrli sózderdiń de yqpaly boldy dep oılaımyn. Ol adamdar qoǵamnan qysym kórgen sııaqty. Tártip saqshylary ustaǵan soń birden jibere salmaý kerek edi. Psıhologtar da jumys jasaý kerek edi. Ekeýi de jas. Olarǵa ýaqtyly qoldaý bolmady», - dedi №59 mektep dırektorynyń orynbasary Gúlnar Dáýletqalıqyzy. Munaradan sekirip ketken Vladımır Shýster 38, al Ásel Dúısenbaeva 33 jasta bolǵan. Ekeýi Qýraıly aýylynda kórshi turyp, 9 aı buryn otbasyn qurǵan.
