Ata-anasyn pyshaqtap tastap, ózin baılap ustady: Aqtóbede atyshýly iske qatysty sot otyrysy bastaldy
AQTÓBE. KAZINFORM — Erli-zaıypty zeınetkerdi óltirip, jertólege tastaǵan, áıeldi birneshe saǵat kepilde ustaǵan aıyptalýshy Sársenbek Basanovtiń isi boıynsha sot aldy tyńdaýy ótti. Oǵan úsh bap boıynsha aıyp taǵyldy.
Aqtóbe oblystyq qylmystyq ister jónindegi mamandandyrylǵan aýdanaralyq sotynda aıyptalýshy Sársenbek Basanovtiń isi qarala bastady. Oǵan Qylmystyq kodekstiń «Adam óltirý», «Bas bostandyǵynan zańsyz aıyrý», «Densaýlyqqa qasaqana aýyrlyǵy ortasha zııan keltirý» baptary boıynsha aıyp taǵyldy. Sot aldy tyńdaýy kezinde prokýror Eldar Ábıev qysqasha aıyptaý aktisin oqydy. Aıyptaý aktisine súıensek, 2024 jyldyń qazan aıynda Sársenbek Basanov ózimen birge turyp jatqan E.Qaztýǵanovanyń buryn basqamen qarym-qatynasta bolǵanyn bilip, qyzǵanysh sezimi týyndady. Ekeýi janjaldasyp, sońynda Sársenbek Basanov E.Qaztýǵanovany urǵan. 2024 jyldyń qarasha aıynda Sársenbek Basanov E.Qaztýǵanovanyń anasy Zına Shaımaǵanbetovamen kezdesip, zańdy nekede turǵysy keletinin aıtady, ruqsat suraıdy. Al Zına Shaımaǵanbetova ekeýara sheshýdi usynady. E.Qaztýǵanova bolsa ata-anasymen birge kámeletke tolmaǵan ulyn tárbıelep otyrǵan soń zańdy nekege turýǵa qulyq tanytpaǵan.
— Sársenbek Basanov 2025 jyly 13 qańtar kúni saǵat tańǵy 05:00–06:00 shamasynda ashýlanyp, E.Qaztýǵanovanyń ata-anasynyń úıine barady. Ol aldyn ala sómkesine pyshaq, buraǵysh, lenta salyp, úıdiń qorshaýynan kiredi. Keıin jazǵy úıdiń terezesin qysyp ashyp, ishke enedi. Sonda saǵat shamamen saǵat 14:30–ǵa deıin jasyryn kútken. Saǵat shamamen 14:30–15:00-de Zına Shaımaǵanbetovanyń as úıge kirgenin kórip, kúshiniń basymdyǵyn paıdalanyp, jedel áreket etýge kóship, kúsh jumsaǵan. Aldyn ala daıyndap ákelgen pyshaǵymen Shaımaǵanbetovaǵa 20 ret, keýdesiniń aldyńǵy jáne artqy bóligine, betine, eki kópesine, júrekke, júrek qaltasyna, qolqasyna, baýyryna, oń jaq jáne sol jaq qoldaryna, qulaǵyna, moınyna pyshaq jaraqatyn salǵan. Sot-medıtsınalyq qorytyndysyna sáıkes Zına Shaımaǵanbetovanyń ólimi kóp mólsherde qan joǵaltqannan bolǵan. Keıin Sársenbek Basanov asa aýyr qylmysyn jasyrý maqsatynda as úıdiń edeniniń astynda ornalasqan jertóleni paıdalanyp, denesin jasyryp tastaǵan. Saǵat 15:30–16:30 shamasy aralyǵynda E.Qaztýǵanova úıde anasy Zına Shaımaǵanbetovanyń joq ekenin baıqap, izdeıdi. As úıdiń esikteriniń ashyq turǵanyn kórip, ishine kirgen boıda bólmeniń oń jaq buryshynda Basanovtyń turǵanyn kórgen. Basanov ashýly kúıde Qaztýǵanovanyń qasyna júgirip kelip, shashynan jáne kúrteshesinen ustap turyp, «jap aýzyńdy, aıqaılama» dep edenge laqtyryp, aldyn ala ózi alyp kelgen lentamen qol-aıaǵyn baılap, aýzyn jaýyp tastaǵan. Osydan keıin Basanov Qaztýǵanovanyń kirpikterin julyp alady, — dedi prokýror.
Aıyptaý aktisine súıensek, sol kúni úıde bolǵan E.Qaztýǵanovanyń ógeı ákesi B.Álıev saǵat 16:25–16:35 shamasynda as úıdiń temir esigin syrttan ashyp kiredi. Ol kirgen bette shoshyp ketip, ústelge súıenip otyryp qalǵan. Sol kezde Sársenbek Basanova ony ustap alyp soqqyǵa jyǵady. Sársenbek Basanov qylmystyq oıyn sońyna deıin jetkizý maqsatynda pyshaqty laqtyryp tastap, shkaftyń astynda jatqan baltany qolyna alyp, birneshe ret soqqy jasaǵan. Keıin jertóleni ashyp, ony laqtyryp jiberedi.
— Biraz ýaqyttan keıin Álıevtiń jertóledegi telefony shyryldaı bastaǵan. Muny estigen Sársenbek Basanov qolyna baltany alyp, qarýlanyp, tómenge túsip, taǵy da birneshe ret soqqy jasaıdy. B.Álıev 13 qańtar saǵat 16:35–ten 14 qańtar saǵat 01:21–ge deıin uzaq ýaqyt boıy qansyryp jatyp, sol jatqan boıy kóz jumǵan. Sot-medıtsınalyq saraptamasyna sáıkes kóp mólsherde qan ketý, bas mıynyń ashyq jaraqatynan kóz jumǵan. Sol kúni saǵat 18:30 shamasynda E.Qaztýǵanovanyń kámeletke tolmaǵan uly as úıdiń ishinde anasynyń bar ekenin anyqtap, lentamen, skochpen baılanyp turǵanyn kórip, júgirip shyǵyp, týystaryna habarlasyp, polıtsııa shaqyrǵan. Basanov shamamen saǵat 15:30–dan bastap Qaztýǵanovany bas bostandyǵynan zańsyz aıyryp, tamaǵyna pyshaq taqaǵan. Quqyq qorǵaý organdarymen uzaq ýaqyt kelissóz júrgizgennen keıin Qaztýǵanova bosatylyp, Basanov ustalǵan. Qylmystyq kodekstiń 99-baby 2-bóligi 1, 3, 5-tarmaǵy, 126-baby 2-bóligi 3, 4-tarmaǵy, 107-baby 1-bóligi boıynsha aıyp taǵyldy, — dedi prokýror Eldar Ábıev.
Іste 4 jábirlenýshi bar. Olar: qaza bolǵan Z.Shaımaǵanbetovanyń apasy, qaza bolǵan B.Álıevtiń eki qyzy jáne E.Qaztýǵanova. B.Álıevtiń qyzdary aıyptalýshyny ómir boıy bas bostandyǵynan aıyrýdy surap otyr.
— Ákemiz Zına apamen 7-8 jyldan beri birge turdy. Ekeýi de keremet adam. Ákemiz olardyń tanys ekenin, úıge kelip júretinin aıtty. Buryn esirtki tutynyp, emdelgeni týraly biz bilemiz. Biraq ol týraly sarapshylar aıtar degen oıdamyz. Ol kezde qandaı jaǵdaıda bolǵanyn da bilmeımiz. Sebebin men de esitigim keledi. Ákemizdi, anamyzdy nege óltirdi, — dedi jábirlenýshiniń biri Anar Tájmuhanova.
Eske salsaq, bıyl 13 qańtar kúni Aqtóbede er adam áıeldi kepilge aldy. Oqıǵa ornynda bolǵan úsh adamnyń ekeýi kóz jumdy. Bireýi aýrýhanaǵa tústi. Birden qylmystyq is qozǵalyp, tergeý júrdi. Kepilde bolǵan áıel birneshe kún aýrýhanada em qabyldady.