Ata-anasyn qarttar úıine tapsyrǵandardyń jalaqysynan 50 paıyz ustaý kerek – depýtat

ASTANA. KAZINFORM – Májilis depýtaty Tańsáýle Serikov ata-anasyn qarttar úıine tapsyrǵan jandardyń jalaqasynyń 50 paıyzyn ustaý kerek degen usynys bildirdi.

Ustalǵan aqsha ata-anasynyń shotyna aýdarylady.

- Soǵys jyldarynda salynbaǵan jetimder úıi men qarttar úıi búgingi beıbit zamanda boı kóterdi. Sonaý 90 jyldary elimiz táýelsizdikti jańa alyp, dúken sóreleri bos bolǵan ýaqytta da qarttar úıindegi qarakóz qarııalar biren-saran ǵana bolsa, búginde 90 paıyzy qazaq ultynan. «Qarttar úıi qara shańyraq pa edi?» Nege zeınetaqy alatyn kúni qarttar úıiniń aldynda qymbat avtokólikter paıda bolady? Ne sebepti ata analaryn qarttar úıine tapsyrady? Álde erli-zaıyptylar arasyna ata-ana artyq boldy ma álde jasy jetken múgedek qarııaǵa qaraý qıyndyq týdyrdy ma, bolmasa jumysynyń júktemesi aýyr boldy ma eken? Biraq sol ata-anasy kishkentaı kezinde qandaı qıyndyq bolsa da, balasyn tastamady ǵoı. Neke jáne otbasy týraly kodeksiniń «Kámeletke tolǵan balalardyń ata-analaryn kútip-baǵý jónindegi mindetteriniń» 145-babynyń 1 bóliminde «Eńbekke jaramdy kámeletke tolǵan balalar ózderiniń kómekke muqtaj, eńbekke jaramsyz ata-anasyn kútip-baǵýǵa jáne olarǵa qamqorlyq jasaýǵa mindetti» jáne «balalarynan alıment óndirip alýǵa quqyly, ol sot tártibimen alynady», - dep Tańsáýle Serikov Úkimet basshysynyń orynbasary Ermek Kósherbaevtyń atyna depýtattyq saýal joldady.

Halyq qalaýlysynyń aıtýynsha, joǵaryda atalǵan zań talaptary oryndalyp jatqan joq.

- Eshbir keıýana óz balasyna shaǵym túsirmeıdi, eshbir ata-ana alıment óndirýge ne densaýlyǵy ne namysy jibermeıdi. Sol sebepti bul bap oryndalmaıdy. Sondyqtan ata-anasyn qarttar úıine tapsyrǵan, qaraýsyz qaldyrǵan balalar, ata analarynyń esepshotyna tapqan jalaqysynyń 50 paıyzyn mólsherlep mindetteý kerekpiz. Árıne, bul qarajat ata-anaǵa degen qurmetke teń kelmeıdi, degenmen materıaldyq óteýi bolýy kerek. Sonymen qatar 70 jastan asqan qarııalardyń atynda jyljymaıtyn múlki bolsa, óler ólgenshe basqa adamnyń atyna rásimdeýge tyıym salýymyz kerek. Qazaq «Áke-shesheń jyndy bolsa baılap baq, biraq tastama» degen. Qartaıyp qyzyq kórer shaǵynda qarııalarymyzdy qańǵytpaı, aıalaýymyz kerek. Bul ár azamatqa qatysty. Ata-anasyn qadirlemegen adam óziniń tiline, ultyna, eline, jerine, memleketke jany ashıtyn adam bolýy múmkin emes. Osyny esten shyǵarmaıyq, - deıdi ol.

Sondaı-aq Májilis depýtaty qarttar men múgedek jandardyń resmı statıstıkasyn keltirdi.

- 2023 jyldyń sońyndaǵy málimet boıynsha elimizde 51 qarttar men múgedekter úıi bar. Onyń ishinde 43 memlekettik, 7 jeke jáne bir ortalyq shetel azamatynyń menshiginde. Qarttar men múgedekter úıleriniń eń kóp sany Shyǵys Qazaqstan oblysynda 11 úı ornalasqan, onyń 6 memlekettik jáne 5 úı jeke menshikte. Shymkent, Almaty, Atyraý qalasynda jáne Aqtóbe, Mańǵystaý, Túrkistan, Jetisý men Ulytaý oblysynda bir qarttar úıi bar. Resmı málimetter boıynsha 2023 jyly qarttar jáne múgedekter úılerinde turatyn azamattar sany 6 824 adamǵa jetti. Onyń 950-i Astanada, 905 adam Shyǵys Qazaqstanda, - dep tolyqtyrdy Tańsáýle Serikov.

Kazinform tilshisi Halyqaralyq qarttar kúni №1 Áleýmettik qyzmet kórsetý ortalyǵyna baryp, ondaǵy turǵyndarmen kezdesken edi.