Ata-anasy qan quıýǵa qarsy bolǵan sábı ólimine qatysty qylmystyq is qozǵaldy

Aqmola oblysynda ata-anasy qan quıýǵa qarsy bolyp, aqyry sábı qaıtys bolǵan edi. Atalǵan oqıǵaǵa qatysty Іshki ister mınıstriniń birinshi orynbasary Marat Qojaev Úkimet otyrysynan keıin ótken baspasóz máslıhatynda túsinik berdi, dep habarlaıdy QazAqparat tilshisi.

«Atalǵan is sotqa deıingi tergeýdiń biryńǵaı tizilimine (EQDB) tirkeldi. Qazirgi ýaqytta balanyń qaıtys bolý faktisi boıynsha qylmystyq is qozǵaldy. Qazir tıisti tergeý sharalary júrgizilip jatyr. Onyń nátıjesi boıynsha dárigerlerdiń de, ata-analardyń da áreketterine baǵa beriledi», - dedi Іshki ister mınıstriniń birinshi orynbasary Marat Qojaev Úkimet otyrysynan keıin ótken baspasóz máslıhatynda.

Onyń aıtýynsha, oqıǵanyń mán-jaıyn anyqtaý úshin keshendi shara júrgizý qajet.

«Bastapqy aqparat boıynsha, ata-analar belgili bir dinı aǵymda bolǵan, sondyqtan olar balasyna qan quıýǵa shynymen qarsy boldy. Sot-medıtsınalyq saraptama taǵaıyndaldy. Sonyń nátıjesinde bala óliminiń sebebi, ıaǵnı ata-anasynyń bas tartýy nemese dárigerlerdiń áreketi anyqtalady. Sondyqtan protsedýralyq áreketter odan ári júrgiziletin sot-medıtsınalyq saraptamanyń nátıjelerin kúteıik», -deıdi ol.

Aıta keteıik, buǵan deıin Aqmola oblysynda ata-anasy qan quıýǵa qarsy bolǵan sábı qaıtys bolǵany týraly habarlaǵan edik.

Dárigerlerdiń aıtýynsha, balanyń ata-anasy medıtsınalyq kómekke óte kesh júgingen.