Oqýshyny sıpalaǵan semeılik muǵalim qazir bilim salasynda jumys istemeıdi - Komıtet

SEMEI. KAZINFORM – Áleýmettik jelide taraǵan Semeı qalasyndaǵy muǵalimniń oqýshy qyzdy sıpalaǵan vıdeosy osydan 2 jyl buryn túsirilgeni anyqtaldy.

Kesheli beri áleýmettik jelide tarap jatqan vıdeoda muǵalimniń oqýshy qyzdy moınynan, qulaǵynan sıpalaǵanyn baıqaýǵa bolady. Buǵan qatysty Oqý-aǵartý mınıstrligi Balalardyń quqyqtaryn qorǵaý komıtetinen jaýap berdi. 

— Belgili bolǵandaı, vıdeo 2023 jyly túsirilgen. Qazirgi tańda oqýshy qyz jalpy orta mekteptiń 9-synybynda oqýyn jalǵastyryp jatyr. Al ersi qylyq jasaǵan muǵalim búginde bilim salasynda jumys istemeıdi. Komıtet burynǵy muǵalimniń áreketine quqyqtyq baǵa berý úshin quzyrǵy organdarǵa da habarlasty, — delingen aqparatta.

Osy rette, Kazinform tilshisi de Abaı oblystyq Polıtsııa departamentimen baılanysqa shyǵyp kórdi. Olar da jelide taraǵan aqparatqa qatysty tekseris júrgizilgenin málim etti.

— Oqıǵanyń eki jyldan astam ýaqyt buryn bolǵany anyqtaldy. Balanyń ata-anasy aryz jazýdan bas tartty, — dep jaýap berdi vedomstvonyń baspasóz qyzmetinen.

Eske salsaq, osyǵan deıin Abaı oblysynda túrmede otyrǵan adam kóz jumǵany habarlanǵan.