Ata-ananyń shaǵymynan keıin Qostanaı oblysyndaǵy balalar lageri jabyldy
ASTANA. KAZINFORM — Sanıtarııalyq talaptardy buzǵan «Svetofor» balalar saýyqtyrý ortalyǵynyń jumysy toqtatyldy, dep habarlaıdy DSM baspasóz qyzmeti.
Densaýlyq saqtaý mınıstrligi balalardy saýyqtyrý uıymdarynda sanıtarııalyq-epıdemıologııalyq talaptardyń saqtalýyn baqylaýdy odan ári kúsheıtip jatyr.
Ata-ananyń ótinishi negizinde júrgizilgen jospardan tys tekserýdiń qorytyndysy boıynsha Qostanaı oblysynda sot sheshimimen sanıtarııalyq normalardyń óreskel buzýshylyqtary anyqtalǵan «Svetofor» balalar saýyqtyrý ortalyǵynyń qyzmeti toqtatyldy.
— Júrgizilgen tekserý barysynda ótinishte kórsetilgen barlyq fakti rastaldy. Mamandar tamaqtandyrýdy uıymdastyrý, sýmen qamtamasyz etý, aýmaq pen úı-jaılardyń sanıtarııalyq jaı-kúıi, sondaı-aq personaldyń mindetti medıtsınalyq tekserýlerden ótý talaptarynyń buzylǵanyn anyqtady. Іs materıaldaryn qaraý nátıjesinde sot ortalyqtyń qyzmetin toqtatý týraly sheshim qabyldady, al buǵan deıin berilgen sanıtarııalyq-epıdemıologııalyq qorytyndynyń kúshi joıyldy, — delingen habarlamada.
Sonymen qatar, Densaýlyq saqtaý mınıstrligi sanıtarııalyq-epıdemıologııalyq qorytyndyny berý kezinde zań buzýshylyqtarǵa jol bergen laýazymdy tulǵalarǵa qatysty qyzmettik tergep-tekserý júrgizdi. Onyń qorytyndysy boıynsha kináli tulǵalar tártiptik jaýapkershilikke tartyldy.
Densaýlyq saqtaý mınıstrligi árbir azamattyń ótinishi erekshe baqylaýda ekenin atap ótedi. Balalardyń qaýipsiz demalysy men saýyqtyrylýy úshin qolaıly jaǵdaılardy qamtamasyz etý memleket úshin sózsiz basymdyq bolyp qala beredi.
Buǵan deıin elordada 180 myńǵa jýyq oqýshy jazǵy lagerlerde demalǵanyn jazdyq.
