Ata-ananyń ruqsatynsyz balalardyń bıometrııalyq derekterin jınaý zańsyz – Jaslan Mádıev
ASTANA. KAZINFORM – Qazaqstanda balalarǵa qatysty bıometrııalyq derekterdi ata-ananyń ruqsatymen jınaý kerek. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev málim etti.
«Jeke derekterdi jınaý balalarǵa qatysty bolsa, ata-ananyń ruqsaty kerek, ruqsatsyz jınalatyn bıometrııalyq derek – zańdy buzý», - dep qysqa qaıyrdy Úkimet otyrysynan keıin BAQ ókilderiniń saýalyna jaýap bergen Jaslan Mádıev.
Mınıstrdiń aıtýynsha, balanyń ata-anasy joq bolǵan jaǵdaıda asyrap alýshy nemese qamqorlyǵyna alǵan azamattyń ruqsaty bolýy tıis.
Aıta ketsek, Úkimet otyrysynda otandyq IT salasynyń damýy sóz boldy. Úkimet basshysy Oljas Bektenov IT habtar men venchýrlik qorlar ekonomıkanyń basty draıverine aınalýy kerektigin aıtty.
Sonymen qatar Premer-mınıstr óńirlerde tsıfrlyq ınfraqurylym tolyq qamtamasyz etilmegenin aıtyp synǵa aldy. Onyń aıtýynsha ákimdikter bul máselege jetkilikti kóńil bólmeıdi.
Odan bólek, Úkimet otyrysynda qazaqstandyq IT mamandardyń jalaqysy 54%-ǵa óskeni aıtyldy.