Ata-ananyń 5 qateligi: ІІM eskertý jasady

ASTANA. KAZINFORM — Іshki ister mınıstrligi eresekter jıi jiberetin bes qatelikti atady, - dep jazdy Polisia.kz. 

Balalardy qaraýsyz qaldyrý aýyr saldarǵa ákelýi múmkin. Mundaı jaǵdaıda týyndaıtyn basty qaýipterdiń qatarynda jol-kólik oqıǵalary, balalardyń terezeden qulap ketýi, sý aıdyndarynda qaza tabýy bar.

Jyl basynan beri balalardyń terezeden qulaýyna baılanysty 50 jaǵdaı tirkeldi, onyń tórteýi ólimmen aıaqtalǵan.

Kólik qaǵýy saldarynan 22 bala kóz jumyp, 1 386-sy jaraqat alǵan. Odan bólek, 10 bala sýǵa batyp ketken.

Balanyń kimmen aralasatynyn qadaǵalamaý onyń jaman ortaǵa túsýine sebep bolýy múmkin. Ata-ananyń nemquraılylyǵy jasóspirimderdiń kúmándi adamdarmen ýaqyt ótkizýine, quqyqbuzýshylyq jasap, psıhoaktıvti zattardy qoldanyp, devıantty minez-qulyqty kórsetýine deıin jetkizýi ábden yqtımal.

Otbasyndaǵy janjaldar, qolaısyz psıhologııalyq ahýal men ata-ananyń teris minez-qulqy da balalardyń qaýipsizdigine keri áserin tıgizedi. Ádette úıdegi urys-keris pen zorlyq-zombylyq kámeletke tolmaǵandardyń boıynda senimsizdik, turaqsyzdyq týdyryp, ynjyq jáne jasyq minez-qulyqtyń qalyptasýyna sebep bolady.

Internet pen gadjetterge erkin qol jetkizýi de qaýipti. Ata-analar balasynyń telefondy nemese planshetti qalaı paıdalanatynyn baqylamasa, ol balanyń qaýipti ınternet qaýymdastyqtarǵa tartylýyna, zorlyq-zombylyqty nasıhattaıtyn tyıym salynǵan kontentti kórýine jáne kúmándi adamdarmen baılanys ornatýyna ákelýi múmkin. Mundaı jaǵdaılar balalarǵa qatysty kıberbýllıng pen zorlyq-zombylyqtyń oryn alýyna sebep bolady.

Tárbıeleý fýnktsııasyn umytý jáne jeke úlginiń mańyzyn elemeý – ata-analardyń taǵy bir úlken qateligi. Keıbir ata-analar balalardy muǵalimder tárbıeleýi tıis dep esepteıdi nemese balanyń neniń durys, neniń burys ekenin ózi túsinedi dep qate oılaıdy. Bul moraldyq-etıkalyq qundylyqtardyń buzylýyna jáne devıantty minez-qulyqtyń týyndaýyna ákep soǵýy múmkin.

Aıta keteıik, ulttyq tasymaldaýshy balalardy poıyzda tasymaldaý erejelerin eske saldy.