Ata-anań qansha tabys tabady - Mektep oqýlyǵynan erekshe «tapsyrma» anyqtaldy
NUR-SULTAN. QazAqparat – Boris Sartayev esimdi Facebook qoldanýshysy otbasylyq bıýdjetke taldaý júrgizý týraly oqýshy qyzyna berilgen tapsyrmaǵa shúıligip, jazba qaldyrdy, dep habarlaıdy QazAqparat tilshisi.
Onyń jazýynsha, oqýlyqtaǵy tapsyrmada oqýshylarǵa ákesi men anasynyń tabysyn jazyp kelý talap etilgen.
«Myna qyzyqty kórip, tań-tamasha qalyp otyrmyn. Qyzym kelip, álemdi taný (ondaı pán tórtinshi synypta bar) boıynsha tapsyrmaǵa kómektesip jiberýimdi ótindi. Uqpaǵan tusyn surady (...). Oqýlyqty jasaýshylar, sizder túnde salyq organdarynda jumys istep júrgen joqsyzdar ma? Myna suraqtyń sıqyn qarańdar! Otbasylyq tabysty balalar arqyly bilip alý jón dep otyrsyńdar ma?» - dep jazady ashýly áke.
Áleýmettik jeli qoldanýshysy oqýlyqtaǵy tapsyrmany qupııa qyzmettiń jumysymen salystyrady.
«Men mundaı oqýlyqtar men tapsyrmalarǵa qarsymyn! Álbette, tabysty jasyrý kerek degen paıym-pikirge súıenip otyrǵan joqpyn. Bul zańsyz», - dedi ol.
Eske sala ketsek, keshe Parlament Májilisindegi Úkimet saǵatynda QR Bilim jáne ǵylym mınıstri Ashat Aımaǵambetov oqýlyq daıarlaý, taldaý sharalaryna syn aıtylyp jatqanyn moıyndaǵan edi. Osy máselelerdi sheshý úshin qazirgi ýaqytta QR Bilim jáne ǵylym mınıstrligi oqýlyq sapasyn jaqsartý jáne saraptaý tetigin jańartý boıynsha jumys júrgizip jatyr. Sondaı-aq avtorlar men sarapshylardy oqytý, oqýlyqtarǵa «jasyryn» sholý jasaý, sarapshylardy sertıfıkattaý uıymdastyrylady.
