Ata-analardyń onlaın Tamyz konferentsııasy ótip jatyr
Onlaın konferentsııaǵa Qazaqstannyń túkpir-túkpirinen 1 myńǵa jýyq ata-ata qatysýda. «Senimen bolashaq» respýblıkalyq ata-analar qoǵamdyq birlestiginiń uıymdastyrýymen ótip jatqan shara aıasynda jańashyl pedagogter men bilim berý salasynyń tabysty menedjerleri dáris oqyp, olardyń ata-analarmen pikir almasýy josparlanǵan.
Mysaly, zertteýshi pedagog Nurlan Imanǵalıev «jańa oqý jylyna ata-ana qalaı daıyndalýy kerek» degen taqyrypta dáris oqyp, ýaqyt menedjmentin tıimdi uıymdastyrý joldaryna toqtaldy.
«Balańyz tabysty azamat bolyp jetilsin deseńiz, oǵan ýaqyt menedjmentin úıretýińiz kerek. Al oǵan birdeńe úıretý úshin ony áýeli ózińiz jetik bilýińiz qajet. Sondyqtan eń áýeli ýaqyt menedjmentin saýatty uıymdastyrýǵa kóńil bólińiz. Ata-analardyń kóbi balasy 11 synypqa kelgende ókinip jatatynyn jyl saıyn kórip júrmiz. Sondaı ókinish bolmaýy úshin balańyzdyń bolashaǵyn 4-5 jyl buryn josparlap daǵdylanyńyz. Sebebi bala armandaı alǵanymen, tabıǵatynan 4-5 jylǵa jospar qura almaıdy. Mysaly, IELTS-ten súrinbeı ótý úshin keminde 120 sabaq alý kerek. Al munsha kólemdegi bilimdi 1-2 aptanyń ishinde alyp úlgerý múmkin emes. Balanyń úlgerimine, synaqtarǵa daıyndyǵyna syn saǵat taıaǵanda emes, erte bastan daıyndalý osy úshin mańyzdy», - deıdi pedagog.
Onyń aıtýynsha, balasynyń bolashaǵyna alańdaıtyn kez kelgen ata-ana qazirgi tehnologııanyń ıgilikterin óz ıkemine qaraı paıdalaný kerektigin aıtty.
«Bilim berý júıesi ózgerip jatyr. Baǵany emes, ár pánniń úırený maqsattaryn ata-ana bilý kerek. Ár pán boıynsha bala bir toqsanda neni úırený kerektigin toqsannyń basynda naqtylap alsańyz, onyń úlgerimin toqsan boıynda qadaǵalap otyra alasyz. Tek alǵan baǵasyn suraı bergennen taqyryp boıynsha pikir almasyp qadaǵalaý áldeqaıda tıimdi», - dedi Nurlan Imanǵalıev.
Onlaın konferentsııa sheńberinde «Jańa urpaq» jobasynyń avtory, otbasy koýchy Ashat Ábjanov, psıholog-pedagog Aıjan Ádilbaeva, «Senimen bolashaq» respýblıkalyq ata-analar qoǵamdyq birlestiginiń mamandary dáris oqyp, trenıngter ótkizý josparlanǵan.