Ata-analardyń 17 paıyzy ǵana balalarynyń akkaýnttaryn baqylap otyr – mınıstrlik
ASTANA. KAZINFORM – Oıyn bıznesi týraly zań jobasy aıasynda elimizde býkmekerlik keńsege tirkelý úshin adamnyń jasy 25-ten asý kerek. Bul týraly Májilis depýtaty Elnur Beısenbaev málim etti.
Onyń aıtýynsha, qumar oıyn derti balalar men jasóspirimderdi de sharpyp otyr.
Quqyq qorǵaý organdarynyń málimetinshe, shamamen 200 myńǵa jýyq kámelet jasyna tolmaǵan bala basqa adamnyń atynan býkmekerlik keńselerge bás tigip, qumar oıyndar oınaıdy eken.
«Ol balalardyń ózderiniń akkaýnttary joq, ıaǵnı ózge akkaýnttar arqyly oınaǵan. Sondaı-aq bul jasóspirimder derekterdi ózgertip, ıaǵnı 21 jasqa tolǵan adam retinde oıynǵa qatysqan nemese aǵasynyń jáne basqa týystarynyń akkaýnttaryn paıdalanǵan. Bul akkaýnttarǵa QIWI Koshelek arqyly qarajat salyp, oıyndaryn júrgizgen. Sondyqtan zań aıasynda býkmekerlik keńselerge atalǵan koshelekter arqyly qarajat toltyrýǵa tyıym salamyz. ıAǵnı, tek karta arqyly qarjy salýǵa bolady. Endi býkmekerlik keńsege tirkelý úshin jasy 25-ten asý kerek jáne boryshkerler tiziminde aty-jóni bolmaýy qajet», - dedi E. Beısenbaev Májiliste tilshiler suraǵyna jaýap bere otyryp.
Sondaı-aq memlekettik qyzmetshilerdiń, quqyq qorǵaý jáne áskerı qyzmetkerlerdiń bás tigýine tyıym salý eskerilgen. Zań jobasynda býkmekerlik keńselerde bás tigý, aqsha alý jáne tóleý kezinde qatysýshylardy beıne-bıometrıkalyq ıdentıfıkatsııadan ótkizý mindetteledi.
«Munymen qosa, jeke kýálik pen bank esep-shotyndaǵy málimetterdiń sáıkestigi tekseriledi. Tek osy málimetter sáıkes bolǵan jaǵdaıda ǵana oınaýǵa ruqsat etiledi. Eger osy júıege qosylmaǵan býkmekerlik keńseler anyqtalsa, olardyń jumysy zańsyz dep tanylady», - dedi depýtat.
Sonymen qatar, QR Oqý-aǵartý vıtse-mınıstri Edil Ospan elimizde ata-analardyń kóbisi balalarynyń smartfondaryn baqylamaıtynyn aıtty.
«Densaýlyq saqtaý mınıstrliginiń aqparatyna sáıkes, jasóspirimder arasynda lýdomanııa dertinen emdelip jatqandar tirkelmegen. Dúnıejúzilik densaýlyq saqtaý uıymynyń málimetine qaraǵanda, lýdomanııa - ol aýrýdyń bir túri. Onymen kúresýdiń eki profılaktıkalyq deńgeıi bar. Birinshisi – jasóspirimderge qumar oıynnyń kesiri týraly túsindirý. Ekinshiden, osyǵan shaldyqqan balalarǵa qatysty psıhologııalyq jumystardy jalǵastyrý eskerilgen. Bilim berý júıesi birinshi deńgeıde profılaktıkany atqarady. 2023 jyly balalardyń qumar oıyndar men kompıýterlik oıyndarǵa táýeldiliginen saqtaýǵa qatysty arnaıy jol kartasy qabyldandy. 2023 jyly júrgizilgen áleýmettik zertteýlerge sáıkes, ata-analardyń tek 17 paıyzy balalarynyń akkaýnttaryna baqylaý jasaıtyn arnaıy qosymshalardy ornatqan. Osy baǵyttaǵy jumysty kúsheıtý úshin ata-analardy qoldaý ortalyqtary aıasynda olardy mektepterge shaqyryp, balalardyń smartfonyndaǵy akkaýnttardy qadaǵalaýǵa alý boıynsha tásilder túsindiriledi», - dedi E. Ospan.
Aıta keteıik, búgin Májilistiń jalpy otyrysynda depýtat Elnur Beısenbaev keıingi eki jarym jylda elimizdiń shamamen árbir besinshi adamy qumar oıyndaryna qandaı da bir qatysy bar degen derek keltirdi. Al, onyń ishinde 400 myńdaı adam oıynǵa salynyp, býkmekerlik keńseler men kazınolardyń turaqty klıentine aınalǵan. Ózge adamnyń logınimen býkmekerlik keńselerge bás tigýshi adamdardyń sany belgisiz.
