Ata-analar úılerinde tek bilim salasyndaǵy saıttardy ǵana qosa alady - Dáýren Abaev

  ASTANA. QazAqparat - Balalardy ınternettegi teris aqparattan qorǵaýda halyqaralyq tájirıbe engizilip jatyr. Bul týraly Senattyń jalpy otyrysynda QR Aqparat jáne kommýnıkatsııalar mınıstri Dáýren Abaev málim etti, dep habarlaıdy QazAqparat.

Senatorlar ınternette keńinen tarap jatqan teris aqparattan balalardy qorǵaý baǵytynda qandaı sharalar atqarylyp jatqanyn surady

«Árıne, bundaı jumystardy biz júrgizip jatyrmyz. Osy sharalar eki baǵytta iske asyrylady. Birinshiden, ata-analarǵa qajetti aqparatty keńinen berý qamtylǵan, ıaǵnı bizdiń qolymyzdaǵy barlyq tetikterdi qoldanamyz. Osy oraıda radıo, ınternet nemese teledıdar, gazetter arqyly taratamyz. Bilim jáne ǵylym mınıstrligimen birlese otyryp, ata-analarǵa tıisti aqparatty jetkizý tásilderi atqarylyp jatyr», - dedi Dáýren Abaev.

Sonymen qatar mınıstr ekinshi baǵyt ta óte mańyzdy ekenin atap ótti.

«Internet operatorlarmen birlesken sharalardy eskerip otyrmyz. Olarǵa da tıisti jobany berdik. Ár ata-anaǵa úıinde «taza» nemese «bilimdi» ınternet ornatý múmkinshiligin berdik. Bul turǵyda 4-5 myńǵa jýyq bilim salasyndaǵy saıttardy úılerinde qoljetimdi ete alady, al qalǵandaryna tyıym salynady. Bul qadamdar halyqaralyq tájirıbeni paıdalana otyryp jasalýda. Atap aıtqanda, bul jumystardy ary qaraı ońtaılandyra túsemiz», - dep túıdi D. Abaev.

Aıta keteıik, búgin Parlament Senatynyń jalpy otyrysynda «Balalardy densaýlyǵy men damýyna zardabyn tıgizetin aqparattan qorǵaý týraly» Zańy qabyldandy.

Budan buryn habarlanǵandaı, qujatta eń aldymen belgili bir jas toptaryndaǵy balalar arasynda qandaı aqparattyq ónimdi taratýǵa tyıym salynatyndyǵy jáne shek qoıylatyndyǵy aıqyndalǵan. Ol úshin balalarǵa arnalǵan aqparattyq ónimniń jas synyby jáne jas sanaty deıtin uǵymdar engizilip otyr.

Joba boıynsha mundaı aqparattyq ónimniń tómendegideı jas sanattary belgilengen. 6 jasqa deıin, 6 jastan asqan, 12 jastaǵy, 14 jastaǵy, 16 jastaǵy balalardyń jetilý jáne dúnıetaný múmkindigine sáıkes jiktelgen. Jalpy alǵanda zań jobasy boıynsha qatigezdik pen zorlyq-zombylyqqa qurylǵan, balalardyń ómirine qater tóndiretin is-áreketke, sondaı-aq sýıtsıdke ıtermeleıtin, pornografııalyq jáne arnaıy seksýaldy-erotıkalyq kórinisterdi qamtıtyn aqparattyq ónimderge tyıym salý qarastyrylýda.