Ata-analar men pedagogterdiń usynysyn jınaqtaıtyn platforma iske qosylady

ASTANA. KAZINFORM — Halyq Keńesiniń kezekti otyrysynda 66 bastama qaraldy. Olardyń qatarynda ǵylymdy qarjylandyrýdy arttyrý, jumysshy mamandardyń tapshylyǵyn azaıtý jáne jastardy jumyspen qamtý máseleleri bar. Sondaı-aq jasandy ıntellektini damytý, ǵylymı uıymdardy qoldaý jáne sheteldegi qazaqstandyq ǵalymdardy elge tartý joldary talqylandy.

Ata-analar men pedagogterdiń usynysyn jınaqtaıtyn platforma iske qosylady
Foto: Kazinform\JI

Kadr daıarlaý máselesimen qatar, otyrysta bilim berý sapasy men balalardyń qaýipsizdigi de kóterildi. Atap aıtqanda, mektepterdegi býllıngtiń aldyn alý, balalardyń psıhologııalyq saýlyǵyn saqtaý, ata-analar men bilim berý uıymdarynyń baılanysyn nyǵaıtý jáne tsıfrlyq ortany sanaly paıdalaný máseleleri talqylandy.

Osy máseleler boıynsha azamattardyń usynystaryn jınaqtap, ortaq sheshim ázirleý úshin «Keńes El» dıalogtik platformasyn damytý usynylyp otyr. Keńes múshesi Murat Ábenovtiń aıtýynsha, alań túrli taraptyń tájirıbesin ortaq usynystarǵa biriktirýge múmkindik beredi.

Ata-analar men pedagogterdiń usynysyn jınaqtaıtyn platforma iske qosylady
Vıdeodan alynǵan skrın

 

— Halyq Keńesi qoǵam men memleket arasyndaǵy kópir bolýy kerek. Azamattardyń máselelesin tyńdap, olardyń tájirıbesi men usynystaryn jetkizý mańyzdy. Osyndaı otyrystarda olardy mamandarmen birge talqylap, iske asyrý joldaryn naqtylaı alamyz.

Bul rette men «Keńes El» aqyldasý alańyn usyndym. Onyń maqsaty — ata-analar, pedagogter, stýdentter, ǵalymdar men jumys berýshilerdiń bilim jáne adamı kapıtal máseleleri boıynsha aqyldasyp, tájirıbe bólisýine jaǵdaı jasaý, — dedi ol Jibek Joly telearnasyndaǵy «Búgin Live» baǵdarlamasynda.

Eske salaıyq, aldaǵy ýaqytta Halyq keńesi óńirlerdegi máselelerdi sheshýge usynystar ázirleıdi.