Ata-analar men muǵalimderden mektepti jóndeýge aqsha jınaýǵa bolmaıdy - mınıstrlik

NUR-SULTAN. QazAqparat – Mektepti jóndeý jumystary jergilikti bıýdjet esebinen júrgiziledi. Jelide qoıylǵan suraqqa oraı, Oqý-aǵartý mınıstrliginiń Bilim jáne ǵylym salasynda sapany qamtamasyz etý komıteti tóraǵasynyń orynbasary Maıra Meldebekova osylaı jaýap qaıtardy, dep habarlaıdy QazAqparat vedomstvonyń baspasóz qyzmetine silteme jasap.

Mınıstrliktiń «Jelige sholý» aıdarynda «Mektebimiz remontqa aqsha jınap jatyr. Qanshalyqty durys?» degen suraq qoıylǵan.

Maıra Meldebekova memlekettik mektepter ákimdikterge qaraıtynyn, ıaǵnı olardy jabdyqtaý, materıaldyq-tehnıkalyq bazasyn nyǵaıtý, sondaı-aq jóndeý jumystary jergilikti bıýdjet esebinen júrgizilýi tıistigin aıtty.

«Sondyqtan da, ata-analar men muǵalimderden mektepti jóndeýge aqsha jınaýǵa bolmaıdy. Bıyl sáýir aıynda «Pedagog mártebesi týraly» zań aıasynda mınıstrliktiń arnaıy buıryǵy qabyldandy. Buıryqta pedagogterdi ózderiniń jumystaryna tán emes basqa jumystarǵa tartýǵa, olardan mınıstrliktiń 130-buıryǵynda qaralmaǵan esepterdi talap etýge bolmaıtyny naqty kórsetilgen. Sonymen qatar, pedagogter jumys barysynda paıdalanatyn qaǵaz nemese basqa da shyǵyndarǵa óz qarajattaryn jumsamaýy kerek. Bul da osy buıryqta kórsetilgen», - dedi ol.

Vedomstvodan málim etkendeı, mektepti jóndeýge aqsha jınap jatsa, quzyrly organdarǵa nemese atalǵan komıtettiń jergilikti departamentterine shaǵymdanýǵa bolady. Quqyq buzý faktileri rastalǵan jaǵdaıda departament qyzmetkerleri ózderiniń konsýltatıvtik-keńesshi organynda qarap, ákimshilik quqyq buzýshylyq kodeksine sáıkes shara qoldanady.