Ata-analar birinshi synypqa baratyn balasyn mektepke ınternet arqyly tirkeı alady

Bul týraly «Ulttyq aqparattyq tehnologııalar» AQ habarlap otyr.

Kompanııanyń saıtynda jazylǵandaı, onlaın tásil arqyly balany «E-learning» elektrondyq bilim berý júıesi engizilgen mektepke (mektepter tizimi elektrondyq úkimet portalynda jarııalanǵan) rásimdeýge bolady.

Onlaın-ótinishti berý úshin, www.egov.kz elektrondyq portalynda tirkelip, balanyń JSN engizip, ótinishti sandyq elektrondyq qoltańbamen bekitý qajet. Qyzmet 5 jumys kúni aıasynda tegin kórsetiledi. Eger bala qamqorshylyqta bolsa, saýalǵa rastaý qujattarynyń kóshirmesin bekitý qajet.

Aıta ketý kerek, ata-analar balasyn jalpy bilim beretin mektepke, mektep-gımnazııaǵa nemese mektep-lıtseıge tirkete alady.

Mektep-gımnazııaǵa nemese mektep-lıtseıge ótinish bergen jaǵdaıda, 3 jumys kúni ishinde paıdalanýshynyń jeke kabınetine qabyldaý emtıhanynan ótý kerektigi, emtıhan qaı ýaqytta jáne qaıda bolatyndyǵy jaıly anyqtama kelip túsedi.

Keıin emtıhan qorytyndysy boıynsha, ata-analarǵa egov.kz portaly arqyly mektepke esepke alý jaıly anyqtama nemese bas tartý sebebin túsindirgen dáıekti jaýap qaıtarylady.

Al jalpy bilim beretin mektepke ótinish bergen jaǵdaıda paıdalanýshynyń jeke kabınetine balasyn mektepke esepke alý jaıly anyqtama nemese bas tartý sebebin túsindirgen dáıekti jaýap 5 jumys kúni ishinde kelip túsedi.

Habarlamada kórsetilgendeı, ata-analar tikeleı mektepke barsa, ózderimen qujattardyń túpnusqalaryn ala barýlary kerek.

Aıta ketý kerek, atalǵan qyzmetke Astana, Almaty qalalarynyń, sonymen qatar Qazaqstannyń oblys jáne aýdan ortalyqtarynyń turǵyndary júgine alady.

Tolyǵyraq aqparatty táýlik boıy jumys atqaratyn call-ortalyq mamandarynan 1414 nómiri arqyly bilýge bolady. Uıaly nemese qala telefondary arqyly qońyraý shalý Qazaqstan boıynsha tegin.