Ata-analar Beıneý garnızonyna baryp, jeke quramnyń jaǵdaıymen tanysty

AQTAÝ. KAZINFORM – Beıneý garnızonynda «Batys» óńirlik qolbasshylyǵynyń barlaý polkinde merzimdi qyzmettegi sarbazdardyń ata-analaryna arnalǵan ashyq esik kúni uıymdastyryldy. 

Sharaǵa Beıneý aýylynan, Mańǵystaý jáne Batys Qazaqstan oblystarynan áskerge shaqyrylǵan sarbazdardyń otyzdan astam ata-anasy qatysty.

Áskerı bólimge kelgen qonaqtar jaýyngerlik daıarlyqtyń uıymdastyrylý barysymen tanysyp, jeke quramnyń turmys jaǵdaıyn, tamaqtaný jáne demalys tártibin kórdi. Sondaı-aq ata-analarǵa bólimniń materıaldyq-tehnıkalyq bazasy, zamanaýı jaraqtandyrylýy jáne áskerı-eseptik mamandyqtarǵa sáıkes sarbazdardy daıarlaý kezinde qoldanylatyn jabdyqtar kórsetildi.

«Áskerı bólimniń basshylyǵy men bólimshe komandırleri ata-analardyń barlyq suraǵyna jaýap berip, uldarynyń qyzmeti men turmys jaǵdaıy týraly jan-jaqty aqparat berdi», – dedi «Batys» óńirlik qolbasshylyǵy áskerleri qolbasshysynyń tárbıe jáne ıdeologııalyq jumys jónindegi orynbasary, podpolkovnık Azamat Jumaǵazıev.

Іs-shara barysynda tárbıelik jumystarǵa, psıhologııalyq qoldaý kórsetýge jáne sarbazdardy oqý-jaýyngerlik mindetterdi oryndaýǵa daıarlaý máselelerine erekshe nazar aýdaryldy.

Áskerı qyzmetshilerdiń biriniń anasy Klara Gýsmanova ashyq esik kúninen alǵan áserimen bólisti. Onyń aıtýynsha, ata-analar kazarmalardy, oqý synyptaryn, ashanany aralap, komandırlermen tildesken.

«Ár ana ulynyń qandaı jaǵdaıda qyzmet etip júrgenin bilgisi keledi. Bárin óz kózimizben kórip, kókeıimizdegi suraqtarǵa tolyq jaýap aldyq. Bólimde tártip, jınaqylyq jáne sarbazdarǵa degen qamqorlyq bar ekeni baıqalady», – dedi ol.

Mundaı sharalar áskerı bólim basshylyǵy men sarbazdardyń otbasylary arasyndaǵy baılanysty nyǵaıtyp, ata-analardyń senimin arttyrýǵa yqpal etedi.

Aıta keteıik, buǵan deıin Aqtaý garnızonynda sarbaz kóz jumǵan bolatyn.