Ata-analar balanyń bos ýaqytyn qalaı ótkizetininen habardar bolýy kerek – Premer-mınıstr
ASTANA. KAZINFORM – Oqýshylar men stýdentterdi ýaqytsha jumyspen qamtý jóninde sharalar qabyldanýy kerek. Bul týraly búgin Úkimet otyrysynda Premer-mınıstr Oljas Bektenov málim etti.
Sondaı-aq balalardyń jolda jaraqat alýynyń profılaktıkasyn kúsheıtý qajet. Jaz kezinde moped, skýter, velosıped júrgizetin kámeletke tolmaǵan balalardyń qatysýymen jol-kólik oqıǵalarynyń sany artady.
-Іshki ister mınıstrligi men ákimdikter ata-analarmen jáne bilim berý uıymdarymen birge júıeli profılaktıkalyq jumystardy qolǵa alsyn. Balalardy, onyń ishinde sporttyq komandalar men shyǵarmashylyq ujymdardy uıymdasqan túrde tasymaldaýǵa erekshe nazar aýdarý kerek. Jolǵa shyqqan kez kelgen ýaqytta qaýipsizdik talaptaryn qatań saqtap, jaýapty qyzmetter mindetti túrde birge alyp júrýge tıis. Týrızm jáne sport mınıstrligi ákimdiktermen birge ishki balalar týrızminiń qoljetimdi bolýyn qamtamasyz etsin, - dedi O. Bektenov.
Úkimet basshysynyń paıymynsha, Mádenıet mınıstrligi jazǵy demalys kezinde balalardyń mýzeılerge, teatrlarǵa, kitaphanalarǵa, mádenı ortalyqtar men ulttyq saıabaqtarǵa tegin barý baǵdarlamalaryn keńeıtýi kerek.
- Eńbek jáne halyqty áleýmettik qorǵaý mınıstrligi ákimdiktermen birge oqýshylar men stýdentterdi ýaqytsha jumyspen qamtý jóninde sharalar qabyldaýǵa tıis, bul rette barlyq eńbek quqyqtary men qaýipsizdik normalaryn saqtaý kerek. Bos jumys oryndarynyń «jármeńkelerin» jáne jumyspen qamtýǵa járdemdesýdiń basqa da nysandaryn uıymdastyrý qajet. Kópbalaly jáne az qamtylǵan otbasylardan shyqqan, sondaı-aq aýyldyq jerlerdegi balalardyń demalysy men olardy saýyqtyrý sharalaryn uıymdastyrýǵa basymdyq berilýge tıis. Balanyń ómirindegi eń mańyzdy qundylyq – ol onyń otbasy. Ata-analar balanyń ómirine beı-jaı qaramaı, aralasatyn ortasyn, qyzyǵýshylyǵy men bos ýaqytyn qalaı ótkizetininen habardar bolýy kerek. Memleket basshysy atap ótkendeı, otbasynda ata-anasynyń meıirimine bólenip, dástúrimizdi bilip, eń jaqyn jandardan ónege alyp ósken bala óz boıyna adaldyq, eńbekqorlyq jáne azamattyq jaýapkershilik qasıetterin sińirgen jeke tulǵa retinde qalyptasady, - dedi Premer-mınıstr.
Budan buryn habarlanǵandaı, oqýshylardyń jazǵy demalysy ortalyqtaryna polıtsııa ınspektorlary bekitildi.
