Ata-analar balalarymen syrlasýdy qoıdy - BǴM
NUR-SULTAN. QazAqparat - Bilim jáne ǵylym mınıstrligi ata-analardyń balasymen áńgimelespeıtinin alǵa tartyp, dabyl qaqty, dep habarlaıdy QazAqparat tilshisi.
«Ata-ana ınternetten bir aqparatty nemese qanatty sózdi oqyp alyp, ózin bilimdi sanaıtyn jaǵdaılar kezdesip jatady. Biz qazirgi ýaqytta ata-analardyń balalarymen ashylyp sóılespeý máselesimen betpe-bet kelip otyrmyz. Balalar gadjetterge aınalyp, ózimen ózi bolyp ketti. Qazir otbasylyq qarym-qatynasta mynadaı tendentsııa baıqalady: ata-ana jatyn bólmeden shyǵyp, jumysqa ketedi - jumystan qaıtyp kelip, balasymen az ǵana áńgimelesip, tamaqtanǵasyn qaıtadan jatyn bólmesine tartady», - dedi QR Bilim jáne ǵylym mınıstriniń keńesshisi Maırash Toıkenova elordada ótken dóńgelek ústel barysynda.
Onyń aıtýynsha, buryn ata-analar men balalar jıi syrlasyp, oı almasatyn.
«Ata-anamyz bizge kóńil aýdaryp, kúndelikti ómirimiz týraly kóbirek suraıtyn. Odan qaldy, áke-sheshelerimiz aýlada oıyn uıymdastyratyn. Múmkin, ata-analar «qazir zaman basqa, ýaqyt joq» deıtin shyǵar, degenmen ol bóten bireýdiń emes, sizdiń balańyz ǵoı», - deıdi ol.
Mınıstrdiń keńesshisiniń aıtýynsha, ár ata-anaǵa óz balasyna durys qaraý kerektigin túsindirý qajet.
«Bizdiń qoǵamnyń problemasy nede? Júz ustazdan bir ákeniń tálimi artyq. Al bizde balalardy mektepke seıf sekildi ákelip tastaıdy da, 11 synypta damyǵan, tárbıeli bala bolyp shyqqanyn qalaıdy», - deıdi keńesshi.
