Ata-analar balalarynyń «zııandy ádetteri» úshin jazalana ma
ASTANA. KAZINFORM — Qazaqstanda ata-analarǵa qatysty zań qatańdatyldy degen málimet rastalmady, dep habarlaıdy Jalǵan aqparatqa qarsy is-qımyl ortalyǵynyń baspasóz qyzmeti.
Vedomstvo málim etkendeı, Qazaqstanda ata-analardyń «balalarda zııandy ádetterdi qalyptastyrǵany úshin» jaýapkershiligi kúsheıtildi degen mazmundaǵy habarlamalardyń taralǵan. Birqatar jarııalanymda quqyq qoldaný praktıkasy men ýákiletti memlekettik organdardyń resmı túsindirmelerine súıenbesten, zańnamaǵa qatysty sýbektıvti pikirler nemese avtorlyq ınterpretatsııalar redaktsııalyq ustanym retinde usynylyp jatyr.
— Mundaı burmalaýlar, ádette, jarııalanymǵa nazar aýdartý, aýdıtorııanyń qamtylýy men belsendiligin arttyrý, sondaı-aq quqyqtyq normalardy repressıvti nemese shamadan tys sıpatta kórsetýge baǵyttalǵan. Sonymen qatar, úreı týdyratyn tujyrymdar quqyqtyq logıkany emotsııalyq baǵalaýmen almastyryp, qoǵamda belgisizdik pen memleket ınstıtýttarǵa degen senimsizdik sezimin qalyptastyrýǵa yqpal etedi, — delingen habarlamada.
QR ІІM Ákimshilik polıtsııa komıtetiniń túsindirýinshe, zańnamada shynymen de QR ÁQBtK-niń 127-babyna sáıkes ata-ana mindetterin oryndamaǵany úshin jaýapkershilik kózdelgen. Alaıda bul jaýapkershilik avtomatty túrde qoldanylmaıdy jáne mán-jaılardyń jıyntyǵy negizinde belgilenedi.
— Mundaı faktorlarǵa alkogoldi júıeli túrde teris paıdalaný, balanyń ómir súrýi men damýy úshin tıisti jaǵdaılardyń bolmaýy, sondaı-aq ata-analardyń balanyń psıhıkalyq jáne moraldyq jaǵdaıyna teris áser etetin minez-qulqy jatady. Árbir is jeke tártippen qaralady, al sheshim barlyq mán-jaıdy eskere otyryp, tek sot arqyly qabyldanady, — delingen ortalyq taratqan habarlamada.
Jalǵan aqparatqa qarsy is-qımyl ortalyǵy jýrnalısterdi, blogerlerdi jáne sarapshylardy quqyqtyq normalarmen jaýapkershilikpen jumys isteýge, ýákiletti organdardyń resmı túsiniktemeler suratýǵa, sondaı-aq azamattardy jańylystyrýy múmkin jeńildetilgen nemese alańdatýshy ınterpretatsııalarǵa jol bermeýge shaqyrady.
Budan buryn Almatyda jalǵan marapat taratqan azamat jaýapqa tartylǵanyn jazǵanbyz.