Ata-analar balabaqshadaǵy jańajyldyq sharalardy onlaın tamashalaıdy
KÓKShETAÝ. QazAqparat – Aqmola oblysynda kópshilik sharalardy ótkizýge tyıym salynǵan. Alaıda, soǵan qaramastan óńirdiń «sary aımaqqa» ótýine baılanysty kezekshi toptaǵy balalar úshin jańajyldyq erteńgilikter ózge formatta ótedi. Bul týraly Aqmola oblysynyń bas sanıtarlyq dárigeri Aınagúl Mýsına málim etti, dep habarlaıdy QazAqparat tilshisi.
Oblystyń bas sanıtarlyq dárigeriniń aıtýynsha, osyǵan deıin bilim berý mekemelerindegi májilis zaldarynda ótkizilip kelgen, dástúrli jańajyldyq erteńgilikterge ruqsat berilmeıdi. Endi olar bólek toptarda ótkiziledi. Al ata-analar sharany ZOOM platformasy arqyly tamashalaı alady.
«Mundaı sheshim óńirde epıdemıologııalyq jaǵdaıdyń turaqsyz bolýynan qabyldanyp otyr. Koronovırýs ınfektsııasyn juqtyrý oqýshylardyń arasynda da kezdesýde. 1 qazannan bastap óńirde oqýshylardyń atalmysh dertti juqtyrýyna qatysty 52 jaǵdaı tirkeldi», - dep atap ótti Aınagúl Mýsına
Aıta keteıik, «Aqmola oblysynyń aýmaǵynda karantındik shekteý sharalaryn odan ári kúsheıtý týraly» Aqmola oblysynyń bas memlekettik sanıtarlyq dárigeriniń 2020 jylǵy 26 qarashadaǵy №224 qaýlysyna ózgerister men tolyqtyrýlar engizilgen bolatyn. Osyǵan baılanysty Kókshetaý jáne Stepnogor qalalaryna kireberis joldardaǵy blokpostar alynady.
