Ata-analar arasynda mektepte aqsha jınaýǵa qatysty saýalnama júrgiziledi
PETROPAVL. QazAqparat - Soltústik Qazaqstan oblysynda Ádep jónindegi keńes músheleri Bilim salasyndaǵy baqylaý departamentiniń basshysy Erlan Ábeldınovten mektepterde aqsha jınaý isin joıý úshin qandaı sharalar qabyldanyp jatqanyn surady, dep habarlaıdy QazAqparat tilshisi.
«Quqyqtyq ádep erejelerinde bilim berý protsesine qatysýshylarǵa qatysty qarjy talap etý derekterin boldyrmaý jáne áriptester tarapynan mundaı isti toqtatý boıynsha muǵalimder mindeti qarastyrylǵan. Departament bul baǵytta qandaı is atqaryp jatyr?», - dep surady Ádep jónindegi keńes tóraǵasy, memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Elena Stepanenko.
E. Ábeldınov atalǵan máseleler departament qyzmetkerleri arasynda únemi talqyǵa salynyp, bilim uıymdary basshylarymen ótetin keńesterde udaıy kóteriletinin jetkizdi. Onyń aıtýynsha, mektepte aqsha jınaýǵa qatysty shaǵymdar túspegen.
«Oqý jylynyń basynda orta mektepterdiń birinde ata-analar synyptyń, mekteptiń qoryna aı saıyn aqsha jınap, erikti túrde demeýshilik kómek kórsetý jóninde kelisim jasady. Mektepter bul isti qarjylandyrýǵa muqtaj bolǵandyqtan jáne aqsha bólinbeıtin keıbir is-sharalardy ótkizý úshin qajet dep aqtalady. Mundaı isti toqtatý úshin qandaı da bir áreketter jasala ma?», - dep surady Ádep jónindegi keńes múshesi, otstavkadaǵy sýdıa, zań ǵylymdarynyń kandıdaty Inessa Qýanova.
E. Ábeldınov bilim júıesinde demeýshilik kómek erikti túrde jasalatynyn aıtty. Eger ata-analar qarjylaı járdem kórsetkileri kelmese nemese shamalary jetpese, kómektesýge mindetti emes. Departament basshysy joǵaryda atalǵan kelisimge qatysty naqty pikir bildire almady. Ata-analar oǵan qol qoımaýǵa jáne vedomstvoǵa shaǵymdanýǵa quqyly ekenin aıtty.
Ádep jónindegi keńes atalmysh máseleler tóńireginde ata-analar arasynda táýelsiz áleýmettik tekseris júrgizýdi usyndy.
