Ata-anadan jınalǵan kez kelgen qarajat zańsyz - Oljas Bektenov

ASTANA. QazAqparat - Búgin Memlekettik qyzmet isteri jáne sybaılas jemqorlyqqa qarsy is-qımyl agenttiginde bilim berý salasynda kórsetiletin qyzmetterdiń sapasyn arttyrý jóninde jınalys ótti. Oǵan QR Bilim jáne ǵylym vıtse-mınıstri Ashat Aımaǵambetov, Astana qalasy ákiminiń orynbasary Ermek Amanshaev, elordalyq bilim berý basqarmasynyń basshysy Ánýar Janǵozın qatysty, dep habarlaıdy agenttiktiń baspasóz qyzmeti.

Kezdesýdi ashqan QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov memlekettik qyzmet kórsetýdi tezirek avtomattandyrý men bilim berý júıesindegi ákimshilik kedergilerdi joıý qajettigin atap ótti.

Ol aqpan aıynan bastap Agenttik pen Astana ákimdiginiń «Astana - adaldyq alańy» birlesken jobasy jumys istep turǵanyn eske saldy. Onyń jumysy jobalyq menedjment prıntsıpterine negizdelgen. Joba sheńberinde bilim berý salasyna júrgizilgen taldaýlar boıynsha birqatar eskertýler men usynymdar ázirlengen.

«Mektepterdegi aqsha jınaý máselesin erekshe atap ótkim keledi. Ókinishke oraı, mundaı salymdar ádetke aınalyp ketti. Kóptegen ata-analardyń eti úırenip ketken jáne dál osylaı bolýy kerek dep sanaıdy. Shyn máninde olaı bolmaýy kerek. Memleket barlyq mekteptiń qajettilikterine, sonyń ishinde jóndeý jumystaryna jáne basqa da is-sharalarǵa jetkilikti qarjy bóledi. Ata-anadan jınalǵan kez kelgen qarajat zańsyz. Bul balabaqshalarǵa da qatysty», - dedi Bektenov. - Memlekettik organdar barlyq usynystardy nazarǵa alyp, máselelerdi sheshýde belsendi jumys isteýi kerek. Bul jumys Astanada ǵana emes, búkil elde júzege asyrylýy tıis».

«Astana - adaldyq alańy» jobasynyń jetekshisi Jazıra Jylqyshıevanyń aıtýynsha, elordalyq mektepterde ata-analardan mektep qajettiligi úshin aqsha jınaý máselesi ózekti bolyp otyr. Áli kúnge deıin balabaqshaǵa qabyldaý úshin «qosymsha» salym talap etedi. Keıbir kolledjderdiń jaǵdaıy órt qaýipsizdigi standarttaryna sáıkes kelmeıdi. Jóndeý jumystary oqýshylar men stýdentter esebinen júzege asyrylady. Balalar bir oqý ornynan ekinshisine aýysqanda keıbir rásimder normatıvti turǵyda  rettelmeıdi, bul da ákimshilik kedergilerdiń týyndaýyna ákep soǵady.

Jınalys sońynda  QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenovtiń jeke baqylaýynda bolatyn kemshilikterdi joıý jóninde hattama jasaldy.

Eske sala keteıik, 2018 jyldyń 7 aqpanynan bastap Astana qalasynda Memlekettik qyzmet isteri jáne sybaılas jemqorlyqqa qarsy is-qımyl agenttigi men Astana qalasy ákimdiginiń jemqorlyqqa qarsy birlesken jobasy júzege asyrylýda.  Onyń maqsaty - ishki sybaılas jemqorlyqty joıý jáne elordanyń memlekettik mekemelerine kelgen azamattarǵa qolaıly jaǵdaı jasaý.