Ata-ana múgedek balasyna járdemaqy alýy úshin neni bilýi kerek
ASTANA. KAZINFORM — Eńbek jáne halyqty áleýmettik qorǵaý mınıstrligi múgedektigi bar balalarǵa járdemaqynyń qalaı taǵaıyndalatynyn túsindirdi.
— Aldymen balaǵa medıtsınalyq-áleýmettik saraptama nátıjesi boıynsha múgedektik belgilenedi. Sodan keıin ata-anaǵa nemese zańdy ókiline járdemaqylardy rásimdeý týraly SMS-habarlama keledi. Kelisim berilgen jaǵdaıda járdemaqylardy memlekettik organdarǵa barmaı-aq rásimdeýge bolady, — dedi Eńbek mınıstriniń keńesshisi Farıda Saǵyndyq vedomstvonyń Telegram-arnasynda jarııalanǵan beınematerıalda.
Onyń túsindirýinshe, bul rette 2 túrli járdemaqy taǵaıyndalady. Birinshisi — balaǵa múgedektigi boıynsha memlekettik járdemaqy. Ekinshisi — múgedektigi bar balany tárbıelep otyrǵan adamǵa beriletin járdemaqy. Eger SMS-habarlama kelmese nemese kelisim rastalmasa ótinishti eGov portaly arqyly nemese Halyqqa qyzmet kórsetý ortalyǵyna júginý arqyly berýge bolady.
— Múgedektigi bar balaǵa 18 jasqa deıin kútim jasaý kezeńi eńbek ótiline esepteledi. Demek, balaǵa kútim jasaýǵa arnalǵan ýaqyt joǵalmaıdy jáne zeınetaqy taǵaıyndaý kezinde eskeriledi. Keıin bul eńbek ótili bazalyq zeınetaqy tóleminiń mólsherin esepteý kezinde qarastyrylady. Sonymen qatar múgedektigi bar balany tárbıeleýmen baılanysty járdemaqy jumys istemese ol úshin mindetti áleýmettik medıtsınalyq saqtandyrýǵa jarnalardy memleket tóleıdi, — dedi ol.
Buǵan deıin Eńbek jáne halyqty áleýmettik qorǵaý mınıstrligi birinshi toptaǵy, qozǵalysy qıyndyqtary bar múgedektigi bar tulǵalarǵa jeke kómekshi qyzmetin kórsetý erejelerine túzetýler ázirlegen edi.
