Ata-ana men bala jaýapkershiligi Konstıtýtsııada aıqyndaldy
ASTANA. KAZINFORM — Jańa Konstıtýtsııada ata-ananyń bala aldyndaǵy, balanyń qartaıǵan ata-anasy aldyndaǵy jaýapkershiligi naqty bekitildi. Bul týraly jýrnalıst Maksım Rojın Jibek Joly telearnasynyń «Búgin LIVE» baǵdarlamasynda aıtty.
Onyń aıtýynsha, bul ózgeris otbasy qundylyǵyn nyǵaıtatyn mańyzdy konstıtýtsııalyq normalardyń biri.
— Konstıtýtsııaǵa engizilgen ózgeristerdiń ishinde maǵan erekshe unaǵany — «Ata-ana balasyna jaýapty, bala qartaıǵan ata-anasyna jaýapty» degen qaǵıda. Ár perzent óz áke-sheshesine qamqor bolýy tıis. Bul — qoǵam úshin asa qasterli otbasy qundylyǵyn saqtaýǵa, ata-anaǵa degen qurmet pen janashyrlyqty arttyrýǵa baǵyttalǵan mańyzdy norma. Sondyqtan bul ózgeristi óte oryndy dep sanaımyn ári onyń Konstıtýtsııaǵa engizilgenine qýanyshtymyn, — dedi Maksım Rojın.
Sondaı-aq ol Konstıtýtsııalyq komıssııa quramynda qoǵam men bılik arasyndaǵy baılanysty kúsheıtýge baǵyttalǵan normalardy ázirleýge qatysqanyn aıtty.
— Komıssııada Halyq keńesi men Quryltaı jumysyna qatysty normalarmen aınalystym. Konstıtýtsııada Halyq keńesine zań usyný quqyǵy berilip otyr. Bul qoǵamdaǵy túıtkilderdi tek aıtyp qana qoımaı, bılikpen ashyq dıalog arqyly zań júzinde sheshýge jol ashady. Sondyqtan bul normalardyń azamattar úshin mańyzy zor, — dedi ol.
Maksım Rojınniń aıtýynsha, Halyq keńesiniń qurylýy qoǵam pikirin zań shyǵarý isine keńinen tartýǵa múmkindik beredi.
— Halyq keńesiniń basty maqsaty — el pikirin eskerý. Buǵan deıin qoǵamdyq keńesterde, Ulttyq quryltaıda jáne ózge de alańdarda kóterilgen máseleler endi osy keńeste qaralyp, zańnamalyq deńgeıde usynylýyna jol ashylady, — dedi ol.
Aıta keteıik, buǵan deıin jańa Konstıtýtsııa halyq bıligin kúsheıtetinin jazǵanbyz.
