Ata-ana qandaı jaǵdaıda balabaqsha vaýcherinen aıyrylýy múmkin
ASTANA. KAZINFORM – Elimizde ata-ana balabaqsha vaýcherin belgilengen ýaqytta rastamasa, onyń ótinishi ýaqytsha toqtatylady. Alaıda ony 28 kúntizbelik kún ishinde bir ret qaıta qalpyna keltirýge bolady. Bul týraly Kazinform agenttiginiń saýalyna QR Oqý-aǵartý mınıstrligi Mektepke deıingi bilim berý departamentiniń dırektory Gúlnara Iskakova málimdedi.
Mınıstrlik málimetinshe, vaýcher alǵan ata-ana ony 2 jumys kúni ishinde rastaýy qajet. Budan keıin 5 jumys kúni ishinde mektepke deıingi uıymdy tańdap, shartqa qol qoıýy kerek.
– Vaýcher rastalmaǵan jaǵdaıda ótinishtiń mártebesi «belsendi emeske» aýysady jáne ony 28 kúntizbelik kún ishinde bir ret qalpyna keltirýge bolady. Vaýcherden bas tartylǵan jaǵdaıda kezektegi ótinish joıylady, – dedi spıker.
Vaýcherdi saqtap qalý úshin balanyń balabaqshaǵa qatysýyn rastaý tártibin de eskerý qajet. Eger mektepke deıingi uıymda qatysýdy avtomatty esepke alatyn elektrondy júıe bolmasa, ata-ana balanyń balabaqshaǵa qatysý tabelin kelesi aıdyń 1-i men 10-y aralyǵynda ETsQ arqyly rastaýy qajet
– Belgilengen merzimde tabel rastalmasa, ol avtomatty túrde rastalǵan bolyp esepteledi. Biraq mundaı múmkindik qatarynan eki aıdan artyq berilmeıdi. Al eki aıdan artyq tabeldi rastamaǵan jaǵdaıda, vaýcher joıylady, - dedi departament dırektory.
Al balanyń qatysýyn avtomatty túrde esepke alatyn júıe qoldanylatyn balabaqshalarda ata-anadan tabeldi kún saıyn rastaý talap etilmeıdi.
Qazir vaýcherlik qarjylandyrý pıloty 20 qala men 23 aýdandaǵy shamamen 6 myń mektepke deıingi uıymda iske asyrylyp jatyr. Joba aıasynda 1,2 mln-nan astam vaýcher berilgen.
Aıta keteıik, buǵan deıin vaýcherlik júıeniń arqasynda balabaqsha kezegi 85%-dan astamǵa qysqarǵany habarlandy.
