Ata-ana balasyn jubatýǵa gadjetin berýdi doǵarýy tıis - Saýytbek Abdrahmanov

ASTANA. QazAqparat - Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine balalardy densaýlyǵy men damýyna zardabyn tıgizetin aqparattan qorǵaý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady, dep habarlaıdy QazAqparat.

«Bul zańnyń naqty jumys isteýi ata-analarǵa, olardyń óz balalary, nemereleri úshin jaýapkershiligine tikeleı qatysty. Mektepterde «aq ınternetti» qansha jerden engizsek te, biraq ata-analar balasynyń tárbıesine tıisinshe kóńil bólmese, ıaǵnı ne kórip júrgenine, qaı kezde teledıdar aldynda otyrǵanymen isi bolmasa, óziniń kompıýterin balalarynyń betaldy ashyp otyrýyna jol berip otyrsa, gadjetin kez kelgen jerge tastaı salatyn bolsa, sondaı-aq tipti balasyna jany ashyǵandyqtan nemese jubatý úshin kóńilin aýlaýǵa qolyna smartfonyn berse, onda bul zańnan naqty nátıje shyǵýy óte qıyn», - dep atap ótti depýtat Saýytbek Abdrahmanov zań jobasyn taqylaý barysynda.

Osy oraıda ol ata-ananyń jaýapkershiligi óte mańyzdy ekenin, sondyqtan Qazaqstan halqy osy máselelerdi eskerýi qajet dep qadap aıtty.

Zań jobasynda Qazaqstan Respýblıkasynyń 1 kodekske jáne 3 zańyna ózgerister men tolyqtyrýlar engizý kózdelgen.