Ata-ana balanyń densaýlyǵyna qaýipsiz sómke tańdaǵany jón – ortoped keńesi
ASTANA. KAZINFORM – Jańa oqý jyly qarsańynda ata-analar mektep formasy men oqý quraldarynan bólek, balanyń densaýlyǵyna qaýipsiz sómke tańdaýǵa da mán bergeni jón. Aýyr sómke, partada durys otyrmaý jáne qımyl-qozǵalystyń azdyǵy omyrtqa qısaıýyna sebep bolýy múmkin. Bul týraly ortoped-travmatolog Oljas Baınazarov Jibek Joly telearnasynyń «Búgin LIVE» baǵdarlamasynda túsindirip berdi.
Mamannyń aıtýynsha, mektep sómkesin tańdaǵanda onyń syrtqy kelbetine emes, eń aldymen salmaǵy men qurylymyna nazar aýdarý qajet.
– Bastaýysh synyp oqýshylarynyń bos sómkesi 600-800 gramnan aspaýy kerek. Orta jáne joǵary synyp oqýshylary úshin bir kelige deıin bolǵany durys. Iyqqa asylatyn baýynyń eni keminde 5-6 santımetr bolýy qajet. Sondaı-aq sómkeni eki ıyqqa birdeı asynyp júrgen durys. «Ortopedııalyq sómke» degen uǵym kóbine marketıng. Eń bastysy osy talaptarǵa saı bolǵany mańyzdy, – dedi Oljas Baınazarov.
Dáriger mektep jasyndaǵy balalar arasynda omyrtqa qısaıýy jıi kezdesetinin aıtty.
– Skolıoz kóbine bastaýysh synyptarda qalyptasa bastaıdy. Buǵan partada durys otyrmaý, sómkeni bir ıyqqa asyp júrý jáne arqa bulshyqetteriniń álsizdigi áser etedi. Sondyqtan mektep jasyndaǵy balalardy jylyna keminde bir ret ortopedke qaratyp turǵan durys, – dedi maman.
Sonymen qatar ortoped omyrtqa qısaıýynyń aldyn alýda partada durys otyrýdyń da mańyzy zor ekenin aıtady.
– Bala otyrǵan kezde tabany tolyq jerge tıip turýy kerek. Tize men jambas býyny shamamen 90 gradýs burysh jasap otyrǵany durys. Sonymen qatar kórý jáne estý qabiletin de teksertip turǵan jón. Keıbir balalar taqtany jaqsy kórý úshin únemi bir jaǵyna qısaıyp otyrady. Bul da ýaqyt óte kele skolıozdyń damýyna áser etýi múmkin, – dedi ol.
Maman náresteler arasynda týa bitken qısyq moıyn jıi kezdesetinin de atap ótti. Onyń aıtýynsha, bul dert erte anyqtalsa, kóp jaǵdaıda otasyz emdeledi.
– Qısyq moıynnyń týa bitken jáne júre paıda bolatyn túrleri bar. Týa bitken túri jıi kezdesedi. Eger alǵashqy aılarda anyqtalsa, massaj jáne basqa da konservatıvti emdeý tásilderi jetkilikti bolady. Al em kesh bastalsa, úsh jastan keıin hırýrgııalyq em qajet bolýy múmkin, – dedi Oljas Baınazarov.
Dáriger ata-analarǵa sábı basyn únemi bir jaqqa buryp jatsa nemese moınyn erkin qımyldata almasa, mindetti túrde ortopedke qaratýǵa keńes berdi. Onyń aıtýynsha, bir jasqa deıin balany 1, 3, 6, 9 jáne 12 aıynda josparly túrde ortopedtiń tekserýinen ótkizý mańyzdy.
Eske sala keteıik, buǵan deıin, balalardyń kórý qabiletiniń nasharlaýyna áser etetin faktorlar týraly oftalmologtyń keńesin jazǵan edik.
