Ata-ana bala densaýlyǵyna jaýapty qaraýy kerek - Birtanov Túrkııada qalǵan sábı týraly
Eske sala ketsek, almatylyq Darıa Vasıleva nárestesin Túrkııada ýaqytynan buryn dúnıege ákelgen. Salmaǵy 750 gramm bolyp týǵan qyz balany ózi bosanǵan klınıkaǵa bereshegi úshin qaldyrǵan. Sábıin tastap, qaıtyp kelgen ata-ana ushaq reısiniń taıap, onyń ústine aqshasyz qalǵanyn aıtyp aqtalady. 25 shilde kúni olardyń qaryzy 15 myń AQSh dollaryna jetken.
Mınıstr sábıdi elge jetkizetin borttyń daıyn ekenin, qazir ákimshilik máseleler sheshilip jatqanyn habarlady.
«Búgin túni boıy Syrtqy ister mınıstrligindegi áriptesterimizben birge Túrkııada merziminen buryn týǵan náresteni elge jetkizý máselesimen aınalystyq. Munda bitpeıtin tehnıkalyq, quqyqtyq, qarjylyq problemalardyń bar ekeni belgili. Osynyń barlyǵyn sheshtik, bort daıyn, balany jaqyn arada elge jetkizemiz. Biraq, eresek adamdardyń júktiliktiń jetinshi aıynda medıtsınalyq saqtandyrýsyz ózge elge barýyn qalaı túsinýge bolady? Saldarynan kelgen barlyq shyǵyn men aýyrtpalyqty memleket, myna otyrǵan siz ben biz kóteremiz. Ózge ata-analar esh medıtsınalyq túsindirýsiz ekpeden bas tartyp jatyr. Sonyń saldarynan elimizde juqpaly aýrýlar kórsetkishi ulǵaıdy. Qyzylsha kóbeıdi. Bul úshin ata-analar jaýap berýi kerek», - dedi mınıstr Astanada «Halyq densaýlyǵy jəne densaýlyq saqtaý júıesi» týraly jańa kodeks jobasyn talqylaý kezinde.
Aıta keteıik, Astanada «Halyq densaýlyǵy jəne densaýlyq saqtaý júıesi» týraly jańa kodeks jobasy talqylanyp jatyr. Jańa qujatta QR Densaýlyq saqtaý mınıstrligi bala densaýlyǵyndaǵy ata-ananyń jaýapkershiligin arttyrýdy, júktilik pen bosanýda dárigerge kesh júgingen, mamandar keńesine qulaq aspaǵan analardy, skrınıngten, vaktsınatsııadan bas tartqandardy ákimshilik jaýapkershilikke tartýdy usynyp otyr.