At sportynan jasóspirimder chempıonaty ótedi

NUR-SULTAN. QazAqparat - 23-30 maýsym kúnderi Almaty qalasynyń irgesindegi ıppodromda ulttyq sport túrlerinen jasóspirimder arasyndaǵy Qazaqstan chempıonaty ótedi, dep habarlaıdy QazAqparat tilshisi.

Ulttyq sport qaýymdastyǵy habarlaǵandaı, jasóspirimder chempıonaty Mádenıet jáne sport mınıstrliginiń jyldyq kúntizbelik josparyna sáıkes Ulttyq sport qaýymdastyǵynyń uıymdastyrýymen jáne Almaty oblysy ákimdiginiń qoldaýymen ótedi. Chempıonatqa 2001-2003 jyldary týǵan jasóspirimder qatysady.

Kókpar, aýdaryspaq, teńge ilýden VІII ret, jamby atýdan V ret uıymdastyrylatyn jasóspirimder chempıonatynyń bıylǵy básekesine barlyq oblystan komandalar qatysady dep josparlanǵan. Qazirgi kezde Almaty qalasynyń irgesindegi «Baıserke» ıppodromynda jasóspirimder chempıonatyn ótkizýdiń sońǵy daıarlyq jumystary qyzý júrip jatyr.

Eske sala keteıik, byltyr jasóspirimder arasyndaǵy Qazaqstan chempıonaty Kókshetaý qalasyndaǵy «Qulager» ıppodromynda ótken bolatyn.

Tamyz aıynda tý kótergen elishilik básekede Almaty qalasy, Aqmola, Túrkistan, Jambyl, Aqtóbe, Qyzylorda, Soltústik Qazaqstan, Batys Qazaqstan, Almaty oblystarynyń jasóspirimderi baq synady. Kókpar sporty boıynsha Túrkistan oblysynyń komandasy bas júldeni talassyz jeńip aldy. Kúmis júlde Jambyl oblysynyń, qola júlde Aqtóbe óńiriniń kókparshylaryna buıyrǵan edi.