At sporty túrlerinen «EKSPO Kýbogy» syıaqysynyń kólemi belgili boldy
ASTANA. QazAQparat - At sporty túrlerinen ótetin «EKSPO Kýbogy» syıaqysynyń kólemi belgili boldy, dep habarlaıdy QazAqparat tilshisi.
Bul jaıynda búgin Ortalyq kommýnıkatsııalar qyzmetinde Elbasy Nursultan Nazarbaevtyń júldesine arnalǵan at sporty túrlerinen «EKSPO Kýbogyn» uıymdastyrý boıynsha ótken baspasóz máslıhatynda belgili boldy.
Oǵan Parlament Májilisiniń depýtaty, Ulttyq sport túrleri qaýymdastyǵynyń prezıdenti Bekbolat Tileýhan, Mádenıet jáne sport mınıstrligi Sport jáne dene shynyqtyrý komıtetiniń tóraǵasy Elsııar Qanaǵatov, onyń orynbasary Serik Jarasbaev, Almaty oblysy ákiminiń orynbasary Jaqsylyq Omar men Almaty oblysy dene shynyqtyrý jáne sport basqarmasynyń basshysy Turatbek Charapıev qatysty.
Alaman báıgede attar 25 shaqyrymǵa shabsa, odan basqa 15 shaqyrymǵa top báıge, 7 shaqyrymǵa jorǵa attar jarysady. Sonymen qatar 7 shaqyrymǵa qunan báıge, 2400 jáne 1800 metrge ushqyr attar jarysy (gladkıe skachkı) ótetini belgili boldy.
Al Sport jáne dene shynyqtyrý komıtetiniń tóraǵasy Elsııar Baımuhameduly jarystyń júlde qory týraly aıtty. Belgili bolǵandaı ushqyr attar jarysynda syıaqy qory 63 mln. 600 000 teńge (200 000 AQSh dollary). Budan basqa 36 mln. teńge (115 000 dollar) kóleminde syıaqy taǵaıyndalady eken. Ol júldegerler arasynda besinshi orynǵa deıin bólinip beriledi.
Jarysqa elimizdiń 14 oblysy men Astana jáne Almaty qalalarynan shabandozdar qatysady. Sondaı-aq, Reseı, Qyrǵyzstan, Tájikstan, Túrkııa, Bolgarııa men basqa da elderden qatysýshylar keledi dep kútilýde.
Alaman báıgede bas júldege 10 mln. teńge, ekinshi orynǵa 5 mln., úshinshi orynǵa 1,5 mln. teńge berilse, márege tórtinshi kelgen adam men besinshi bolyp jetken shabandozǵa tıisinshe 1 mln. men 500 000 teńge syıaqy beriledi.
Top báıgede jeńimpazǵa 5 mln. teńge, kúmis júldegerge 2 mln., úshinshi orynǵa 1 mln., márege tórtinshi kelgen adamǵa 500 000 men besinshi orynǵa 300 000 teńge taǵaıyndalady. Qunan báıgede bas júldege 3 mln., kúmis júldegerge 1,5 mln., qola júldegerge 1mln., tórtinshi orynǵa 500 000 men besinshi orynǵa 300 000 teńge beriledi. Jorǵa attar jarysynda jeńimpaz 1,5 mln., kúmis medalıst 700 000 teńge, qola júldeger 400 000, tórtinshi jáne besinshi oryndy qanaǵat tutqan adam 200 000 men 100 000 teńge alady.
Jarystyń úzilis kezinde «teńge ilý», «jamby atý», «qyz qýý», qazaqy tazy ıtter jarysy sııaqty ulttyq sport túrlerinen kórsetilimder uıymdastyrylady.
Jarys Mádenıet jáne sport mınıstrligi, Ulttyq sport túrleri qaýymdastyǵy, Astana qalasynyń ákimdigi, Almaty oblysynyń ákimdigi men Qazaqstannyń báıge túrleri qoǵamynyń uıymdastyrýymen ótedi.
