At sportyndaǵy jańa beles: Qazaqstan 2026 jyly FEI jarystaryn ótkizetin el retinde bekitildi
ASTANA. KAZINFORM — Gonkong qalasynda Halyqaralyq at sporty federatsııasynyń (FEI) Bas assambleıasy aıaqtaldy. Bul — álemdik at sporty salasynyń damý baǵytyn aıqyndaıtyn sheshimder qabyldanatyn jyl saıynǵy jahandyq forým. Bul týraly Qazaqstan at sporty federatsııasy málim etti.
Bıyl Assambleıa jumysyna FEI-diń 132 múshe eliniń ishinen 87 ulttyq federatsııanyń delegatsııalary qatysty. Qazaqstan 1993 jyldan beri FEI-ge múshe memleket. Osy ýaqyt boıy Assambleıa jumysyna turaqty túrde qatysyp keledi.
Halyqaralyq at sporty federatsııasy (FEI) 1921 jyly qurylǵan jáne júz jyldan astam ýaqyt boıy at sportyna arnalǵan halyqaralyq erejeler men jarystar júıesin qalyptastyryp keledi. Assambleıanyń alǵashqy kúnderinde Qazaqstan delegatsııasy konkýr men atpen mánerlep júrý erejelerine ózgerister engizý, Olımpıada oıyndaryna jáne 2026 jyly Aahen qalasynda ótetin FEI Álem chempıonatyna irikteý formaty sııaqty máselelerdi talqylaýǵa qatysty. Sondaı-aq sportshylardyń qaýipsizdigi men jylqylardyń ál-aýqaty, tsıfrlyq veterınarııalyq pasportty engizý jáne ashyqtyq pen kásibılikke baǵyttalǵan FEI-diń jańa basqarý úlgisi qaraldy. 12 jyl boıy uıymdy basqarǵan FEI prezıdenti Ingmar de Vos ókilettigin aıaqtap, Halyqaralyq olımpıadalyq komıtettegi jańa qyzmetke aýysady.
6–7 qarashada plenarlyq otyrystar men daýys berýler ótti. Qazaqstan 2026 jyly FEI aıasynda úsh halyqaralyq jarys ótkizý quqyǵyn aldy: Dúnıejúzilik kýbok kezeńi, FEI World Cup Challenge fınaly jáne Eýrazııalyq lıga fınaly. Bul qazaqstandyq sportshylarǵa alǵash ret halyqaralyq reıtıngtik upaılardy óz elinde jınaýǵa múmkindik beredi, sheteldik jarystarǵa qatysý shyǵyndaryn azaıtady jáne turaqty halyqaralyq jarys tájirıbesin qamtamasyz etedi.
— Dúnıejúzilik kýbok kezeńin, FEI World Cup Challenge fınalyn jáne 2026 jyly Aahendegi FEI Álem chempıonatyna irikteý týrnırin ótkizý quqyǵy — Qazaqstanda at sportynyń júıeli damýyna jasalǵan mańyzdy qadam. Endi bizdiń sportshylar elden shyqpaı-aq halyqaralyq reıtıngtik upaı jınaı alady. Jas shabandozdar úshin FEI World Cup Challenge álemdik fınalyna qatysý múmkindigi ashylady. Basty maqsatymyz — jarystardy joǵary deńgeıde uıymdastyryp, osy múmkindikti sportshylardy daıyndaý úshin barynsha tıimdi paıdalaný, — dedi Qazaqstan at sporty federatsııasy prezıdentiniń keńesshisi Sergeı Býıkevıch.
Assambleıa barysynda FEI prezıdenti Ingmar de Vos Qazaqstanda jarystar ótkizý federatsııanyń halyqaralyq týrnırler geografııasyn keńeıtý jáne jańa elderdi jahandyq sporttyq kúntizbege tartý maqsattaryna sáıkes keletinin atap ótti, osylaısha bul bastamany qoldaıtynyn bildirdi.
Qazaqstan Assambleıa barysynda jattyqtyrýshylardy daıarlaý jáne sportshylardy oqytý júıesin jetildirý boıynsha jobalardy tanystyrdy. FEI jáne Olympic Solidarity Coaching System baǵdarlamasyn engizý jáne sportshylardy halyqaralyq deńgeıde sertıfıkattaý jónindegi pılottyq jobany qoldady.
Assambleıa jumysy Longines FEI Awards halyqaralyq marapattaý rásimimen aıaqtaldy. Shara barysynda jyl qorytyndysy shyǵarylyp, sportshylardyń, jattyqtyrýshylardyń, at kútýshilerdiń (groom) jáne jarys uıymdastyrýshylarynyń jetistikteri atap ótildi.
Eske sala keteıik, buǵan deıin at sportyna memleketten qoldaý jetispeı turǵanyn jazǵan edik.