At sportyna memleketten qoldaý jetispeı tur
ASTANA. KAZINFORM – Álemde 57 mıllıonnan astam jylqy bar. Onyń shamamen 5 mıllıony Qazaqstanda eken. Soǵan qaramastan, elimizde at sporty kenje qalyp keledi.
Osydan bir aı buryn atbegiler jastardyń jylqydan alystap bara jatqanyn aıtyp, dabyl qaqqan edi.
Bul joly sportshylar at sportynyń damýy úshin memleketten kóńil bólinse dep qolqa salyp otyr. Óıtkeni keı halyqaralyq jarystarǵa qatysý úshin óz qaltamyzdan shyǵyndalamyz deıdi olar.
– At sporty – eń qymbat sport túrleriniń biri. Shyǵyny jaǵynan ekinshi orynda tur. Sebebi, atty baptap, densaýlyǵyn kútý kerek. Onyń kerek-jaraǵy men ábzelderiniń bárin ózimiz satyp alamyz. Atqa miný – qazaqtyń qanyndaǵy qasıet qoı. Sol úshin bul sportty damytyp, buqaralyq sport túrine aınaldyrý qajet. Elimizde jarystardyń kóp ótkizilgenin qalaımyz. Sonda ǵana kóp tájirıbe jınaı alamyz. Bizdiń basty jarystarymyz – Qazaqstan chempıonaty, ashyq jáne jabyq Qazaqstan kýbogy, balalar men jasóspirimder arasyndaǵy chempıonat, 4–7 jas aralyǵyndaǵy attarǵa arnalǵan chempıonat qana. Qalǵandary – ekinshi dárejeli baıqaýlar. Oǵan qosa, halyqaralyq sharalar kóptep ótip, sheteldik qatysýshylarmen de jıi baq synasqymyz keledi. Olarǵa qarap, birinshi oryn alýǵa umtylamyz, - deıdi sportshy Nýrıla Turysbekova Kazinform tilshisine bergen suhbatynda.
Al jattyqtyrýshylar federatsııaǵa jańa prezıdent taǵaıyndalǵaly biraz ózgeristerdiń bolyp jatqanyn aıtady. Dese de, bul sportty damytýǵa jalǵyz sportshylar men federatsııanyń shamasy kelmeıtinin de tilge tıek etti.
– Memleket qoldamasa, bizdiń sportshylarymyz úlken deńgeıge shyǵa almaıdy. Sportshylarymyzdyń 90 paıyzy jarysqa óz attarymen nemese demeýshilerdiń kómegimen qatysady. Bul deńgeıde biz Azııa oıyndary men Eýropadaǵy jarystarǵa shyǵa almaımyz. Memleket tarapynan qarjylaı qoldaý kórsetilse deımiz. Sońǵy ýaqytta sportshylarymyz jaqsy jetistikterge jetip jatyr. Sol sebepti, bıyldan bastap mınıstrliktiń kózine túsip, qoldaýǵa ıe bolamyz degen úmittemiz, - deıdi At sportynan QR qurama komandasynyń bas bapkeri Áset Tolqynbekov.
Aıta keteıik, elimizde At sporty federatsııasy 32 jyldan beri jumys isteıdi. Alaıda, at sporty olımpıadalyq sport túrleriniń qataryna jatqanyna qaramastan, Qazaqstanda nebári 50-ge jýyq halyqaralyq dárejedegi sportshy bar.