At sporty: Astanada úsh birdeı FEI týrnıri qatar ótedi
Astana. KAZINFORM — 29-31 mamyr aralyǵynda Astanada alǵash ret Fédération Équestre Internationale (FEI) uıymynyń úsh halyqaralyq týrnıri bir mezette ótkizilmek. Elordada FEI álem kýbogynyń kezeńi, FEI World Cup Challenge fınaly jáne CDI1*/CDI3* halyqaralyq saıysy qatar uıymdastyrylady.
Uıymdastyrýshylardyń aıtýynsha, aldaǵy dodaǵa Brazılııa, Kolýmbııa, Úndistan, Marokko, Jańa Zelandııa, Ońtústik Afrıka, Mysyr, Ekvador, Reseı, Ózbekstan jáne ózge de elderdiń shabandozdary qatysady.
Jarys baǵdarlamasyna halyqaralyq deńgeıdegi konkýr men atpen mánerlep júrý saıystary engen. Týrnırdiń sharyqtaý shegi – 160 sm bıiktikke deıin jetetin konkýrdan Álem kýbogynyń Gran-prı básekesi.
Atalǵan jarystar FEI-diń 2026 jyly Ahende ótetin álem chempıonatyna irikteý kezeńderiniń biri sanalady. Eń bastysy, qazaqstandyq sportshylar halyqaralyq reıtıng upaıyn endi shetelge shyqpaı-aq, elde jınaı alady.
— Saıysqa daıyndyq joǵary deńgeıde. Sáıgúliktiń jem-shóbi men dári-dármegin baqylaımyz, kúndelikti rejımdi qadaǵalaımyz, — deıdi konkýrdan halyqaralyq dárejedegi sport sheberi, Qazaqstan Respýblıkasynyń chempıony Nurıla Turysbekova.
Astanada birden úsh FEI týrnıriniń ótýi Qazaqstannyń álemdik at sporty keńistigindegi ornyn nyǵaıta túsetin mańyzdy qadam retinde baǵalanýda.
Aıta keteıik, buǵan deıin elordada Qurban aıt merekesi jáne QR Memlekettik rámizder kúnine oraı respýblıkalyq báıge uıymdastyrylatynyn jazǵan edik.
