Asyrap alynǵan jetkinshekterdi balalar úıine qaıtarý faktisi kóbeıgen
Depýtattyń aıtýynsha, keıingi 5 jylda asyrap alynǵan jetkinshekterdi balalar úıine qaıtarý faktileri 64 paıyzǵa artqan. 2020 jyly 160 bala, 2021 jyly – 197, 2022 jyly 217 bala qaıtarylǵan. Asyrap alǵan balasynan bas tartqan ata-anaǵa memleket tarapynan berilgen 75 AEK kólemindegi qarajatty memleketke keri qaıtarý, alıment tóleý jáne ekinshi ret bala asyrap alý múmkindiginen aıyrý sııaqty quqyqtyq jaýapkershilik sharalary zańda qarastyrylǵan. Mundaı jaǵdaılar balanyń psıhıkalyq densaýlyǵyna qatty áser etedi. Sonymen qatar, balalar eńbegin paıdalaný faktileri de tirkelgen.
«Bala asyrap alýshylardy 3 jylǵa deıin tolyq baqylaýynda ustap, arnaıy súıemeldeý jumystaryn júrgizip otyratyn Bala asyrap alý ulttyq agenttigi bar. Atalǵan agenttik aıasynda ata-analarǵa súıemeldeýshilik kómek, psıholog, zańger syndy mamandardyń qyzmeti usynylady. Alaıda bul agenttiktiń múmkindigi barlyq el aýmaǵyn qamtýǵa áli de jetpeıtini belgili. Bul turǵyda bala asyrap alýǵa nıet bildirgen azamattarmen jumys isteıtin ortalyqtardyń aýqymyn keńeıtip, áleýmettik qyzmetkerdiń sanyn kóbeıtý qajet», - dedi A. Tolamısov Úkimet basshysynyń orynbasary Tamara Dúısenovanyń atyna joldaǵan saýalynda.
Onyń paıymynsha, bala asyrap alýshy ata-analarǵa arnalǵan mamandandyrylǵan ortalyqtardyń jumysyn keńeıtý kerek.
«Atalǵan aqparattardyń qataryna asyrap alynǵan bala qaıtarylǵan kezdegi zań aldyndaǵy jaýapkershiligi týraly aqparat ta engizilse. Sonymen qatar, bala asyrap alýshy ata-analarǵa arnalǵan arnaıy mamandandyrylǵan mektep nemese ortalyqtardyń jumysyn keńeıtý mańyzdy. Belgili bir ýaqyttan keıin asyrap alǵan baladan bas tartqan otbasylarǵa zań júzinde jaýapkershilikti áli de bolsa kúsheıtý, moraldyq shyǵyn retinde qomaqty mólsherde aıyppul salý máselesi qarastyrylýy kerek», - dedi Amangeldi Tolamısov.
