Asyljan Mamytbekov naryqtaǵy astyqtyń baǵasyn óte jaqsy dep baǵalady

ASTANA. 23 qyrkúıek. QazAqparat - Bıyl astyqtyń baǵasy jaqsy bolǵandyqtan «Azyq-túlik korporatsııasy» sharýalardan bıdaıdy múldem satyp almaýy múmkin. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda QR Aýyl sharýashylyǵy mınıstri Asyljan Mamytbekov málim etti.

«Qazirgi ýaqytta 3-synypty astyqtyń ortasha baǵasy tonnasyna 27-28 myń teńgeni qurap otyr. Bul bizdiń boljaǵan kórsetkishten áldeqaıda kóbirek. Sondyqtan qazirgi kezde «Azyq-túlik korporatsııasynyń» satyp alý aktsııasyn ashýǵa sál erterek bolýda. Atap aıtqanda, búginde jınalǵan 12,5 mln. tonna astyqtyń elevatorlaǵa tek 2 mln. tonnasy jetkizildi», - dedi mınıstr.

«Biz bul jaǵdaıǵa belsendi túrde monıtorıg júrgizýdemiz. Qazirgi ýaqytta elevatorlarǵa astyq kóp jetkizilip jatqan joq. Eksport júrip jatyr, sonymen qatar ishki qajettilik te bar, sondyqtan naryq tıisti teńgerimdi ustap otyr. Biraq bul teńgerim astyq baǵasynyń tómendeýine qaraı buzylatyn bolsa, onda kez kelgen ýaqytta «Azyq-túlik korporatsııasy» óziniń satyp alý aktsııasyn bastaýǵa daıyn bolady. Jylda bul aktsııany «Azyq-túlik korporatsııasy» qyrkúıektiń basynda bastaıtyn edi, biraq ta bıyl egin orý naýqany eki aptaǵa keshirek bastaldy»,- dedi A. Mamytbekov.

«Azyq-túlik korporatsııasy» astyq satyp alý aktsııasyn qashan bastaıdy?» degen saýalǵa A. Mamytbekov: «Osy satyp alýlar bıyl múldem qajet bolmaýy múmkin. Óıtkeni naryqtaǵy tonnasyna 27-28 myń teńge - bul óte jaqsy baǵa. Biraq qysqa merzimde baǵa tómendese, onda atalǵan satyp alýlar bastalady», - dedi vedomstvo basshysy.

Sońǵy 4-5 jylda «Azyq-túlik korporatsııasy» astyq naryǵyn turaqtandyrý maqsatynda atalǵan satyp alýlardy júzege asyryp keledi. Mınıstrliktiń paıymynsha, bıyl naryqtaǵy jaǵdaı memlekettik organdardyń belsendi aralasýyn qajet etpeı otyr, sebebi naryqtaǵy suranys pen usynys teńgerimdi qalypta.