Asyly Osman: Túrkistan - ıisi túriktiń jan-júregi
ALMATY.QazAqparat - Ǵalym-fılolog Asyly Osman QazAqparat tilshisine Túrkistannyń tórge ozýy qazaqtyń ǵana emes, ıisi túriktiń qýanyshy ekenin aıtyp berdi.
Ońtústik Qazaqstan oblysy Túrkistan topyraǵynyń týmasy ǵalym-fılolog Asyly Osman: «Elbasynyń Túrkistandy oblys ortalyǵy etý týraly Jarlyǵy tóbemdi kóke jetkizdi», - deıdi.
«Alty qazaqtyń bireýi qaımaǵy buzylmaǵan Ońtústikte turady. Túrkistannyń tórge ozýy bizdiń ǵana emes, ıisi túriktiń rýhyn asqaqtatty. Bul qýanyshtyń Maǵjan Jumabaevtyń 125 jyldyǵymen qatar kelýiniń ózi ǵanıbet. Ol kezdeısoqtyq emes, halqymyzdyń adal nıeti. Elbasymyzdyń eren eńbeginiń arqasy. Álbette, munyń bári táýelsizdigimizdiń jemisi», - dedi Asyly Osman.
«Túrkistan - eki dúnıe esigi ǵoı,
Túrkistan - er túriktiń besigi ǵoı.
Tamasha Túrkistandaı jerde týǵan
Túriktiń Táńiri bergen nesibesi ǵoı», - dep jyrlaǵan Maǵjan Jumabaevtyń týǵanyna bıyl 125 jyl tolyp otyr.
«Abaı aqyldyń aqyny bolatyn bolsa, Maǵjan aqyndardyń aqyny. Maǵjan ómir boıy túrik dep ótken. «Ertede Túrkistandy Turan desken, Turanda er túrigim týyp-ósken» degen Maǵjannyń túrikshildigi, otansúıgishtigi, el birligin ańsaǵan armany, tilegi osy óleńinde jatyr», - dep sózin túıindedi Asyly Osman.
Kezinde Stalındik saıasattyń ámirimen Qazaqstanǵa otbasymen jer aýdarylǵan Asyly Álıqyzynyń balalyq shaǵy Túlkibas aýdanynda ótken. Ol Túrkistan pedýchılışesinde bilim alǵanyn maqtanyshpen aıtady.
«Túrkistan Respýblıkasyn qurý ata-babamyzdyń armany bolatyn. Mustafa Shoqaı, Álıhan Bókeıhanov, Turar Rysqulovtardyń qalaýy búgin oryndalyp jatyr. Túrkistan áýlıeler jatqan jer, eń aqyry Abylaı hanymyz da osynda jerlengen. Taıaq qadasań tal bolatyn, shybyq shanyshsań shynar bolatyn, aýasy taza, sýy tunyq ońtústiktiń qasıetti ekenine daý joq», - dedi Asyly Osman.
Qoǵam qaıratkeri qadamnyń sátti bastalǵanyna, Túrkistannyń túrki jurtynyń rýhanı astanasy bolatynyna senim bildirdi.
«Káris ulty ókiliniń Kentaýdy ekinshi Shveıtsarııa degenin estýim bar. Túlkibasty birinshi Qyrym der edim. Túrkistannan 60 shaqyrymdaı jerde Ýkasha ata degen áýlıeli meken bar. Endigi arman qazaqtyń kóp jınalǵan jeri osy Túrkistan bolsa, keleshek rýhanı astanamyz bolyp, óristeıtitine kámil senemin», - dep sózin aıaqtady Asyly Osman
Aıta ketý kerek, Elbasymyz Nursultan Nazarbaevtyń Jarlyǵymen Ońtústik Qazaqstan oblysynyń ákimshilik ortalyǵy Shymkent qalasynan Túrkistan qalasyna kóshirilip, Shymkent qalasy respýblıkalyq mańyzy bar qalalardyń sanatyna jatqyzylǵan edi.
