Asyly Osman: Qıyn kezeńde bútinin bólip, baýyryna basqan qazaq halqyna alǵysymyz sheksiz

ALMATY. QazAqparat- 1 naýryz kúni elimizde jalpyhalyqtyq mereke - Alǵys aıtý kúni atalyp ótedi. Osy mereke qarsańynda belgili qoǵam qaıratkeri, Qazaqstan halqy Assambleıasynyń múshesi, Qazaqstannyń eńbek sińirgen qaıratkeri, fılologııa ǵylymynyń doktory, professor, til janashyry Asyly Osman qazaq halqyna degen rızashylyǵy bildirdi, dep habarlaıdy QazAqparat tilshisi.

Onyń aıtýynsha, Alǵys sóziniń ózi ystyq yqylas, jyly júrekpen aıtylǵan izgi nıettegi sóz.

«Alǵys degen sózdiń máni erekshe. Qıyn kezeńde jartysyn jaryp, bútinin bólip, ózge etnostardy baýyryna basqan Qazaq halqyna alǵysymyz sheksiz. Sol dáýirlerde bizge pana da, ana da bolǵan - qazaq. Qazaq halqynyń arqasynda biz búgingi kúnge jetip otyrmyz», - deıdi Asyly Osman.

Qazaqstan halqy Assambleıasy múshesiniń oıynsha, jer betinde Qazaq halqyndaı halyq joq.

« Óz basym alǵysty aldymen kóktegi Qudaıǵa, odan keıin jerdegi darhandyǵy dalasynan daryǵan sol dalanyń ıesi Qazaq degen halyqqa aıtamyn. Sózi qýatty, júzi shýaqty, tilegi tunyq, nıeti aq, eshkimdi jatsynbaıtyn qazaq halqyna barsha etnos ókilderi qaryzdar. Qazaq halqy bulttan tómen bolǵanymen ózgeden bıik dep sanaımyn «,-deıdi ol.

Sonymen qatar, ol árbir otbasy bir-bir memleket ekenin atap ótti. Otbasynda tynyshtyq bolsa, memlekettiń de birligi bekem bolady, dostyq nyǵaıady. Bul oraıda Qazaqstan halqy Assambleıasynyń atqaryp otyrǵan róli zor.

«Biz «Alǵys aıtý kúninde» ǵana emes, árdaıym bir-birimizge shynaıy nıetimizdi, alǵysymyzdy bildirip júrýimiz kerek. Qazaqstan halqy Assambleıasynyń da basty maqsaty – ultaralyq kelisimdi nyǵaıtý, elimizdegi turaqtylyqty qamtamasyz etý»,- dedi Qazaqstannyń eńbek sińirgen qaıratkeri.

Aıta keteıik, 2015 jyldyń sáýir aıynda QHA 22-shi sessııasy men QHA 20 jyldyǵyn merekeleý kezinde QR Tuńǵysh Prezıdenti – Elbasy Qazaqstanda Alǵys kúnin atap ótýdi usyndy. Bul kún - barlyq qazaqstandyqtardyń bir-birine degen mahabbaty men dostyǵynyń jarqyn belgisi.