Asyly Osman: Qazaqstanǵa jer jetpeıdi, basqa jer júregimdi terbetpeıdi
«Elbasynyń Jarlyǵymen osydan eki jyl buryn belgilengen Alǵys aıtý kúni keshegi surapyl kúnderi qazaq jerin, qazaq ultyn pana tutqan ózge ult ókilderiniń bir sát bolsa da oılanyp, osy bir azat kúnge jetkizip, týǵanyndaı baýyryna basqan eldiń ókilderine rızashylyǵyn bildirip, meıirbandyǵyna meıirimdilik kórsetý zańdylyq dep baǵalaımyn. Qazaqstan halqy Assambleıasynyń qurylǵan kúnimen tuspa-tus keletin bul kúni men qatty tolǵanamyn. Óıtkeni men qazaq halqynyń meıirimi men júrek jylýyn úsh jasymnan bastap kúni búginge deıin kórip kele jatqandardyń birimin», - dep jazady Asyly Osman.
Sondaı-aq, ol ótken jyly kindik qany tamǵan Qap taýynyń baýraıyndaǵy Havetke barǵanyn eske alyp, ol sapardyń ótken aýyr kúnderden habardar etip, tarıhty tanytyp, jan dúnıesin tebirentkenin aıtady. «Osy sapar barysynda Havettegi jartylaı tastan, jartylaı topyraqtan salynǵan úılerdi kórip kókiregim qan jylady. Jol boıy kúızelgen, kúńirengen el, kúrsingen dala, túnergen taýdy kórsem de ómir joly óte kúrdeli ári qaterli meniń sanamdaǵy qazaq degen jalǵyz uǵym júregimdi terbep, Qazaqstanǵa jer jetpeıtindigin, basqa jerdiń júregimdi terbetpeıtindigin uǵyndym. Otan ottan da ystyq, men úshin bir ǵana Otan, bir ǵana jurt bar ol qazaq jurty ekendigin, júregimde týǵan jerge emes, turǵan jerge degen mahabbattyń basym ekendigin sezindim. Aıaly janarynan adam balasyna degen jylylyq pen meıirim oty ushqyndaǵan qazaqty qadirlep, qasterleý adamı paryzymyz, azamattyq boryshymyz dep baǵalaımyn», - dep jazady Asyly Osman.
«Men qaıda júrsem de bar kúshimdi Qazaqstannyń baǵy men baqyty, erki men erkindigi jolynda sarp etpekpin. Tirligimizdiń tiregi - tatýlyqty tý etip, tóbeme kóterip, qazaǵymnyń rýhyn bıiktetemin. Qazaǵymdy aıalaımyn anamdaı, arqasúıer panamdaı. Jasap, jańara ber 130 ult pen ulystyń urpaǵyn baýyryna basqan, azamattyq kelisimdi tuǵyr etip, túrli mádenıetter men dinderdi toǵystyryp, kóp ulttyń tatýlyǵyn tý etip otyrǵan zaıyrly memleketim - Qazaqstanym, Qazaǵym!» dep aıaqtaıdy sózin qaıratker.
