Asylbek Qojahmetov: Qoǵamdyq keńes ókilderin Ulttyq keńestiń jumysyna tartý kerek
«Azamattyq qoǵam partııalarǵa qaraǵanda bılikke umtylmaıdy. Azamattyq qoǵam bıliktiń jumysyna baqylaý jasaı alatyn bolsa, halyqtyń belsendiligi, ózin-ózi basqarýǵa degen umtylysy artar edi», - dedi ol elordadaǵy Ulttyq qoǵamdyq senim keńesiniń alǵashqy otyrysy
Onyń aıtýynsha, qoǵamdyq keńestiń jumysyndaǵy negizgi máselelerdiń biri – azamattyq qoǵamdy damytýǵa járdemdesý.
«Shyn máninde, bul baǵyt bizdiń ulttyq keńestiń ataýynda belgilenip tur. Azamattyq qoǵam men qoǵamdyq keńester birin-biri tolyqtyryp turýǵa negizdelgen qurylymdar. Sol ýaqytta biz qazaqstandyq qoǵam áldeqaıda belsendi bola túsedi. Máselen, qazirgi ýaqytta mınıstrlikter men oblystyq, aýdandyq ákimdikter janynda 226 qoǵamdyq keńes jumys isteıdi. Onyń 75 paıyzy azamattyq qoǵam ókilderi. Ókinishtisi, mınıstrlikter men ákimdikterde qurylǵan qoǵamdyq keńester qyzmetiniń mazmuny olarǵa júktelgen mindetterge saı kele bermeıdi. Qoǵamdyq keńester óz áleýetin tolyqqandy iske asyra almaı jatyr», - dedi ol.
Asylbek Qojahmetov óz sózinde Ulttyq keńes qoǵamdyq keńesterdi shoǵyrlandyrýshy ári yntalandyrýshy qurylym bolǵandyqtan, onyń qurylymyn áli de damyta túsý kerek degen pikir bildirdi.
«Sondyqtan, jergilikti jáne aımaqtyq qoǵamdyq keńesterden sol óńirdegi áleýmettik hal-ahýaldy bilip otyrý úshin ulttyq keńeske qoǵamdyq saraptamalar kerek. Osyndaı áreketter qoǵamdyq keńes jumysyn jaqsartýdyń bir joly bolar edi. Aımaqtyń jáne salalyq qoǵamdyq keńestiń ókilderin Ulttyq keńestiń jumysyna jáne jumysshy toptaryna tartý kerek dep oılaımyn», - dedi ol.
