Asyl tuqymdy jylqyǵa arnap zań shyǵarý orynsyz – Álıhan Smaıylov

ASTANA. QazAqparat – Premer-Mınıstr Álıhan Smaıylov Senat depýtattarynyń Qostanaı tekti jylqy tuqymyna arnap zań shyǵarý týraly usynysyna jaýap berdi, dep habarlaıdy QazAqparat tilshisi.

«Qazirgi tańda ǵylymı-tehnıkalyq tapsyrma ázirlendi. Keıin ol Ǵylym jáne joǵary bilim mınıstrliginiń qaraýyna engiziledi. Joǵaryda aıtylǵandardy eskere otyryp, Qostanaı tekti qazaqı jylqy tuqymyn saqtaý jáne molaıtý máselesi boıynsha jeke zań ázirleý oryndy emes dep esepteımiz», - dep jazdy Úkimet basshysy.

Premer-Mınıstrdiń jaýabynda, atalǵan máseleni retteıtin zań elimizde onsyz da bar.

«Asyl tuqymdy mal sharýashylyǵy týraly» zań aıasynda asyl tuqymdy maldardyń genofondyn saqtaý jáne kóbeıtý, sondaı-aq olardyń ónimdilik qasıetterin molaıtý jáne jaqsartý, asyl tuqymdy mal sharýashylyǵy salasynda jumys isteıtin memlekettik organdardyń, jeke jáne zańdy tulǵalardyń qyzmetin retteý kózdelgen», - delingen jaýapta.

Eske salsaq, byltyr Prezıdent Qasym-Jomart Toqaev Úkimetke Adaı jylqysyn ǵylymı túrde asyl tuqymdy mal retinde tanyp, sanyn kóbeıtý úshin tıisti jumystardy jedel qolǵa alýdy tapsyrǵan bolatyn.