Asyl tuqymdy mal sharýashylyǵyn damytý úshin birqatar zańdarǵa túzetýler engiziledi
ASTANA. Qarashanyń 3-i. QazAqparat. /Aıdyn Báımen/ - Asyl tuqymdy mal sharýashylyǵyn damytý úshin birqatar zańdarǵa túzetýler engizilip otyr.
Ótken jyly Úkimet qarasha aıynda «Qazaqstan Respýblıkasynyń keıbir zańnamalyq aktilerine asyl tuqymdy mal sharýashylyǵy máseleleri boıynsha ózgerister men tolyqtyrýlar engizý týraly» zań jobasyn Májiliske bergen bolatyn. Osy Palatanyń Agrarlyq máseleler komıteti zań jobasyn qarap shyǵyp, óz qorytyndysyn usyndy, dep habarlaıdy QazAqparat.
Zań jobasyn qabyldaýdyń maqsaty - asyl tuqymdy mal sharýashylyǵy máseleleri boıynsha zańnamany jetildirý. Asyl tuqymdy ónim alý úshin aýyl sharýashylyǵy óndirisinde paıdalanylatyn janýarlar tizimi keńeıtilip otyr.
Depýtattar birneshe usynystar men tolyqtyrýlar bergen. Salystyrma kestege parlamentshilerdiń 29 túzetýi engizilgen. Onyń barlyǵy bas komıtet pen jumys tobynda qabyldanǵan.
Zań jobasy erteń, qarashanyń 4-i kúni, ótetin Palatanyń jalpy otyrysynyń kún tártibine usynylyp otyr.
