Asyl tuqymdy mal sharýashylyǵy salasyna jyl saıyn 2 mlrd. teńgeden astam qarajat bólinip otyr
ashanyń 4-i. QazAqparat /Qanat Mámetqazyuly/ - Elimizdegi asyl tuqymdy mal sharýashylyǵyn damytýǵa jyl saıyn 2 mlrd. teńgege jýyq qarajat bólinip keledi. Búgin QR Parlamenti Májilisiniń jalpy otyrysynda aýyl sharýashylyǵy vıtse-mınıstri Arman Evnıev osylaı málim etti,
dep habarlaıdy QazAqparat.
«Úkimettiń qoldaýymen asyl tuqymdy mal sharýashylyǵynda osyndaı sanatqa jatatyn analyq mal basyn baǵyp-ustaý jónindegi sharalardy sýbsıdııalaý baǵyty júzege asatyn bolady. Zań jobasyndaǵy bul norma sharýashylyq sýbektileriniń asyl tuqymdy mal basyn ósirýdi yntalandyrady. Osy maqsattar úshin 2009-2012 jyldar aralyǵynda jyl saıyn 2,5 mlrd. teńgege jýyq qarajat bólinip otyr. 2012-2014 jyldarǵa arnalǵan respýblıkalyq bıýdjetten jylyna 2 mlrd. teńgeden astam qarjy qarastyrylady. Bul úsh jylda 6 mlrd. teńgeni quraıtyn bolady», dedi Aýyl sharýashylyǵy vıtse-mınıstri Arman Evnıev. Onyń aıtýynsha, jalpy mal sharýashylyǵynyń ónimdiligin arttyrýǵa baılanysty sýbsıdııa retinde 2009 jyly 11,6 mlrd. teńge bólinse, 2010 jyly - 13 mlrd., 2011 jyly -13,2 mlrd. teńge bólý kózdeledi.
Degenmen depýtattar zań jobasyn talqylaý barysynda birqatar kemshilikterdiń oryn alǵanyna nazar aýdartty. Máselen, depýtat Qurmanǵalı Ýálı salystyrmaly kesteniń qazaqsha mátinindegi oryn alǵan kemshilikterdi synǵa aldy. «Bunda qazaqı asyl tuqymdy maldardy tizbektep kelip, solardyń qataryna ıtti de qosyp jibergen. Sonda úıdiń haıýanaty asyl tuqymdy maldardyń qataryna qalaı qosylmaqshy. Esesine, bundaı maldyń arasyna eshki kirmeı qalǵan, aıyr órkeshti túıe kirgen de, nar enbeı qalǵan», dedi Q. Ýálı.
Óz kezeginde depýtattar da oryn alǵan kemshilikterge qatysty pikirlerin bildirip, túzetýler jasady. «Zańda mal men ıtti bólip kórsete almasaq, erteńgi kúni ájýáǵa qalarymyz ras», deıdi depýtat Aldan Smaıyl.
