Asyl tuqymdy mal sharýashylyǵy máselelerine arnalǵan zań jobasy Májiliste úshinshi oqylymda talqylanatyn bolady
ANA. 29 maýsym. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine asyl tuqymdy mal sharýashylyǵy máseleleri boıynsha ózgerister men tolyqtyrýlar engizý týraly» zań jobasyn ekinshi
oqylymda maquldady. Qujat odan saıyn jetildire túsý úshin úshinshi oqylymda da Májiliste talqylanatyn bolady. Osyǵan oraı zań jobasy májilistiń bas komıtetine tapsyryldy.
Zań jobasy elimizdegi asyl tuqymdy mal sharýashylyǵy máseleleri boıynsha qoldanystaǵy zańnamany jetildirýge baǵyttalady. Bul rette, ósimdik jáne mal sharýashylyǵynyń negizgi salalaryn damytýmen qatar bal arasy sharýashylyǵy men balyq sharýashylyǵy sııaqty qosymsha salalardy qoldaý sharalary qarastyrylyp otyr. Osylaısha zań jobasynda «mal» degen uǵymdy keńeıtý kózdeledi. Bul olarǵa aýyl sharýashylyǵynda ónim, sonyń ishinde asyl tuqymdy ónim alý úshin tabysty paıdalanylatyn janýarlardyń jańa túrlerin jatqyzýǵa múmkindik beredi.
Zań jobasynda usynylyp otyrǵan normalar taza tuqymdy bal arasy men balyqtardy ósirýmen aınalysatyn jeke jáne zańdy tulǵalarǵa asyl tuqymdy mal sharýashylyǵy salasyndaǵy sýbekt mártebesin berýdi kózdeıdi. Al qus sharýashylyqtaryn asyldandyrý jumysyn júrgizý deńgeıine baılanysty asyl tuqymdy mal zaýyttary men maldy asyldandyrýshy sharýashylyqtarǵa bólýge múmkindik beredi. Osyǵan baılanysty asyl tuqymdy qus fermalary men qusty asyldandyrýshy sharýashylyqtardyń qus sharýashylyǵynda selektsııalyq-asyldandyrý jumysynyń júrgizilý deńgeıi boıynsha arajigin ajyratý engiziledi. Qujatty qabyldaý bolashaqta asyl tuqymdy mal sharýashylyǵy salasyndaǵy sýbektilerdiń sany men osyndaı maldyń úles salmaǵyn arttyrýǵa múmkindik beredi.
