Asyl dinimizben úılesken mereke baýyrmaldyq pen tatýlyqqa úndeıdi - Bas múftı
«Shýaqty kóktemniń kelgenin bildiretin naýryz - halqymyz úshin merekeli hám berekeli aı. Qystan shyǵyp, kóńili kóldeı shalqyǵan kóshpeli jurttyń turmysynda erekshe oryn alǵan ulttyq meıramymyz osy aıdyń enshisinde.
Ulystyń uly kúninde jasalatyn ulttyq ádet-ǵuryptardyń urpaqqa berer tárbıesi men taǵylymy mol. Asyl dinimizben úılesken ulttyq merekemiz adamzat balasyn baýyrmaldyq pen tatýlyqqa, meıirbandyq pen dostyqqa úndeıdi», - deıdi Serikbaı Oraz.
Bas múftı duǵagóı ájelerdiń jasaǵan naýryz kójesi - merekeniń mánin keltiretin nyshan ekenin aıta kele, shyn kóńil-nıetpen jasalyp, usynylǵan as adamdar arasynda meıirimdilik pen keshirimdilik syndy asyl qasıetterdi qalyptastyratynyn atap ótken. Bul kúni ulttyq sport túrlerinen túrli jarystar uıymdastyrylady. «Paıǵambarymyz Muhammed (oǵan Allanyń salaýaty men sálemi bolsyn) balany atqa mingizip, sadaq atýǵa, sýda júzýdi úıretip, kúrestirýdi ósıet etken», - dedi Múftııat tóraǵasy
Sondaı-aq ol Naýryz meıramy kúnderi saýapty amaldardyń biri aǵash otyrǵyzý, kórshi-qolań, quda-jekjat, aǵaıyn-týysty aralap, aman-saýlyq surasý, keshirim suraý, qaıyrymdylyq jasaý ekendigin aıtady.
«Qadirli baýyrlar, barshańyzdy ultymyzdyń ulyq meıramy - Naýryz merekesimen quttyqtaımyn! Kúlli túrki jurtynyń tól toıy - áz Naýryz elimizdegi túrli ultty uıymshyldyqqa uıystyryp, keshirim men meıirimniń merekesine aınalyp keledi. Dostyq pen tatýlyqtyń, baýyrmaldyqtyń, ıgilik hám birliktiń, izgilik pen izettiliktiń meıramy qutty bolsyn! Ulys oń bolsyn, aq mol bolsyn. Alla Taǵala halqymyzǵa árqashan amandyq, jurtymyzǵa tynyshtyq násip etkeı. Táýelsizdigimiz baıandy bolǵaı!», - delingen quttyqtaýda.
