«Asyl bala» uıymy ShQO-ǵa kómek retinde 3,5 mln teńge aýdardy
ASTANA. QazAqparat - «Asyl bala» qaıyrymdylyq uıymy Shyǵys Qazaqstan oblysyndaǵy sý tasqynynan zardap shekken balalalarǵa kómek retinde 3,5 mln teńge qarajat aýdardy, dep habarlaıdy «QazAqparat» HAA tilshisi.
«Asyl bala» ókilderiniń aıtýynsha, qarajat QR balalar quqyǵy boıynsha ýákili Zaǵıpa Balıevanyń bastamasymen «Aıagóz Bolashaq» qoryna aýdarylǵan. Bul qarajat balalardyń jyly kıimi men azyq-túligine, dári-dármek jáne basqa da kerek-jaraqtaryna jumsalmaq.
«Asyl Bala» aýdarǵan qarajatty metsenattar jınap bergen. Olar mundaı sharalarǵa alǵash ret qaıyrymdylyq jasap turǵan joq. Ótken jyly Aqmola, Qaraǵandy, Aqtóbe oblystaryndaǵy sý tasqynynan zardap shekken balalarǵa da dál osyndaı kómek kórsetilgen.
Esterińizge sala keteıik, qazir ShQO-da 230 úıdi sý basyp jatyr, óńirde barlyǵy tasqyn sýdan 489 baspana búlingen.
