Asyq oıyny tuńǵysh ret oqýshylar spartakıadasy qataryna engizildi
ASTANA. QazAqparat - Dástúrli ótkizilip kele jatqan mektep jáne kolledj oqýshylarynyń arasyndaǵy 8-shi jazǵy spartakıadanyń qataryna bıyl tuńǵysh ret ulttyq oıynymyz - asyq atý sporty engizilip otyr.
Spartakııada sheńberinde oqýshylar arasynda ótkizilgen respýblıkalyq deńgeıdegi asyq atý týrnıri Astana qalasynda óziniń baıraǵyn kóterdi.
Jarysqa respýblıkamyzdyń túpkir-túpkirinen Atyraý, Jambyl, Aqmola, Qostanaı, Almaty oblysy, Mańǵystaý oblysy, Soltústik Qazaqstan oblystary, Astana jáne Almaty qalalarynan 9 komandadan quralǵan 60-qa jýyq sportshy qatysty.
Týrnırdiń ashylý saltanatynda sóz alǵan QR «Asyq atý» federatsııasynyń vıtse-prezıdenti Jomart Sabyrjanov: «Asyq atý jarystary munymen toqtap qalmaıdy. Aldaǵy maýsym aıynda Qazaqstan Respýblıkasynyń kýbogy uıymdastyrylady. Sosyn elorda kúni qarsańynda dál osy sport túrinen halyqaralyq týrnır ótedi. Mine, búgin bizdiń jastarymyz sol baıraqty básekelerge qatysýǵa daıyndalyp jatyr»,- dedi.
Elimizdiń jan-jaǵynan jınalǵan sportshy oqýshylar elorda tórinde ózderiniń mergendikterin, eptilikterin, shapshańdyqtaryn baıqatty.
«Asyq sekildi qundylyqtarymyzdyń astarynda bizdiń tarıhymyz jatyr. Asyq oıyny jas balalardy myqtylyqqa, mergendikke úıretedi. Sondyqtan da bul týrnırdiń tárıbelik máni basymyraq.- deıdi Astana qalasy komandasynyń jattyqtyrýshysy Eskendir Rahmetov.
Eki kúnge sozylǵan básekeniń qorytyndysy boıynsha, komandalyq esepte Jambyl oblysy birinshi oryn, Astana qalasy ekinshi oryn, Qostanaı oblysy úshinshi oryn aldy.
Al jekeleı syndarda Aqmola, Qostanaı, Jambyl oblystarynan kelgen komandalar ózderiniń sheberlikterimen toptan ozdy.
